Август уйăхĕн пуçламăшĕнче, виçĕ кун хушши, ведомствăсем хушшинчи комисси районти вĕренỹ учрежденийĕсене тĕрĕсленĕ. Комисси шкулсемпе ача сачĕсене, хушма пĕлỹ паракан учрежденисене çитсе çĕнĕ вĕренỹ çулне мĕнле хатĕрленнине тишкернĕ. Комисси членĕсем пỹлĕмсене, спортплощадкăсене, мастерскойсене, спорт оборудованийĕпе инвентарьне, сĕтел-пукансене, апатлану йĕркине тĕрĕсленĕ.
Тĕрĕслев районти шкулсем çĕнĕ вĕренỹ çулне хатĕр пулнине палăртнă. Вĕсенче юсав ĕçĕсене туллин ирттернĕ. Акă Шулю шкулĕнче вĕренекенсем кăçалтан нушапа тула тухмĕç. Халĕ кунта шалтах туалет ĕçлеме пуçлĕ. Тата кунта тăрăшакансем хăйсен вăйĕпе шкул патне каякан çула йĕркене кĕртнĕ. Ытти шкулсенче те пỹлĕмсене çĕнĕ сĕм кĕртнĕ. Мăн Этмен шкулĕнче хальлĕхе капиталлă юсав ĕçĕсем пыраççĕ-ха. Анчах кунта та ĕçсем август уйăхĕнче вĕçленмелле. Шкул ачасене сентябрĕн 1-мĕшĕнче кĕтсе илме пур вăйран хатĕрленет.
Райадминистрацин вĕренỹ пайĕ пĕлтернĕ тăрăх, малтанласа палăртнипе кăçал шкула 1396 ача вĕренме каймалла. Парта хушшине пĕрремĕш хут 131 ача лармалла. Вĕсен шучĕ ытларах та пулĕ.
А.ВАСЮКОВА.