РФ Çемье Кодексĕ ыйтнине пурнăçласа Пĕрремĕш Липовкăри Владимир Храмовпа Ишеккассин-чи Оксана Михопарова пĕрлешсе çемье чăмăртанине регистрациленĕ. Вĕсем кăçал пĕрлешнĕ 35-мĕш мăшăр пулнă. Владимирпа Оксана Храмовсене мăшăрланнă ятпа нумай ачаллă Фроловсен çемйи саламланă. Анна Евгеньевнăпа Денис Владимирович Фроловсен нумаях пулмасть кил-йышра пепке хушăннă. Фроловсем Храмовсене те ЗАГС пайне виçĕ хутчен килсе ача çуралнине регистрацилеме суннă. ЗАГС пайĕн ертỹçи Ирина Егорова Фроловсен ачине, районта кăçал çуралнă 60-мĕш ачана, регистрациленĕ май çапла каланă: "Пĕрремĕш ача халăх валли, иккĕмĕш - асаннепе асатте валли, виççĕмĕшне Турă ашшĕ-амăшне пăхма парать", - тенĕ.
Тепĕр савăнăçлă пулăм Татьянăпа Михаил Беловсен çемйинче пулнă. Вĕсен çемйинче иккĕмĕш ача çуралнă, ăна ашшĕ-амăшĕ Виктория ят панă.
А.ДМИТРИЕВА.