Иртнĕ шăматкун, мартăн 30-мĕшĕнче, Чăваш наци конгресĕпе ЧР Культура министерстви йĕркеленипе "Кĕмĕл сасă" конкурс-фестиваль пулчĕ. Кăçалхипе çирĕммĕш хут пулнă конкурс Çеçпĕл Мишши ячĕллĕ Çамрăксен театрĕнче çỹллĕ шайра иртрĕ.

Хĕрлĕ Чутай район чысне унта Татьяна Зарубина хỹтĕлерĕ. Шăпчăк сассиллĕ пултаруллă юрăç районти Ачасен искусство шкулĕнче ĕçлет. Вăл конкурса Светлана Асамат илемлетнĕ "Шур-шур урлă" чăваш халăх юррипе тухрĕ. Вырăс хĕрĕ чăваш тумне тăхăнса чăвашла илемлĕ юрлани чăннипех те куракансен кăмăлне çĕклерĕ.

Сăмах май, фестивале 35 çулчченхи 30 юрăç хутшăнчĕ. Татьяна Зарубина вара "Кĕмĕл сасă-2019" конкурс дипломанчĕ пулса тăчĕ.

Ю.МАРЕЕВА, ЧНК-н районти уйрăмĕн ертỹçи.