Ку вăхăт тĕлне районти ялхуçалăх предприятийĕсемпе фермер хуçалăхĕсен уйĕсем пушанса çитнĕ ĕнтĕ, тинех хура çĕр канлĕн тĕлĕрме пултарать. Выльăх-чĕрлĕх усракан хуçалăхсенче вăй хуракан ял ĕçченĕн вара канма вăхăт çук. Çанталăка пăхмасăр вĕсен выльăхсене кулленех апатпа тивĕçтерессишĕн тăрăшмалла, кĕрхисене акса пĕтермелле.

Район администрацийĕн ялхуçалăх пайĕ пĕлтернĕ тăрăх, октябрĕн 2-мĕшĕ тĕлне ялхуçалăх предприятийĕсемпе фермер хуçалăхĕсем пĕрчĕллĕ тата пăрçа йышши культурăсене пĕтĕмпе 3939 гектар çинчен пухса кĕртнĕ, 9475 тонна тырă тĕшĕленĕ. Вăтам тухăç гектар пуçне 24,1 центнерпа танлашнă. Иккĕмĕш çăкăра 15,91 гектар çинчен пухса кĕртнĕ - 310 тонна çĕрулми. Кукурузăна 498 гектар çинчен пухса илнĕ. Кĕрхи культурăсене акма 1542 гектар çĕр хатĕрленĕ. Кĕрхисене 1509 гектар çинче акса хăварнă.

Çавăн пекех ялхуçалăх предприятийĕсемпе фермер хуçалăхĕсем выльăх валли 4008 тонна утă хатĕрленĕ, 12500 тонна сенаж тата 3500 тонна силос хывнă.

А.ВАСЮКОВА.