Туктамăшра пурăнакан, райадминистрацин физкультурăпа спорт тата çамрăксен политикин секторĕн заведующийĕнче вăй хуракан Алексей Никитина пĕлмен-палламан çын çук. "Районти спорта тытса пыракан", - теççĕ ун пирки.

Алексей Михайловичăн спорта аталантарас енĕпе тунă ĕçĕсем чăннипех те курăмлă. Ахальтен мар пуль ăна "Чăваш Республикин физкультурăпа спортăн тава тивĕçлĕ ĕçченĕ" хисеплĕ ят панă. Çак кунсенче вара вăл районта физкультурăпа спорт мероприятийĕсене тăтăшах ирттернĕшĕн райадминистраци пуçлăхĕн Тав сăмахне тивĕçрĕ.

Алексей Никитина районта спорта аталантарассишĕн çунакан çын пек кăна мар, алла купăс тытса тĕрлĕ культура мероприятийĕсене хутшăннăран та пĕлеççĕ. Вăл час-часах куракансем умне сăввине те, кĕввине те хăй çырнă юрăсемпе тухать. Халăх ăна кĕтет, юратса йышăнать.

Республикăри паллă артистсем те Алексей Никитинăн юррисене шăрантараççĕ. Акă, "Тăван радиопа" унăн "Пурнăç пултăр малалла" юррине тăтăшах илтме пулать, ăна Вячеслав Христофоровпа Марта Зайцева юрлаççĕ.

- Сăвă-юрă халăха юратнипе çуралать, - тет Алексей Михайлович. - Малалла пурăнса татах ырă ĕçсем тăвас, çынсене хамăн юррăмсемпе савăнтарса ырă сунас килет.

А.КАРПОВА.