Чăваш Республикин Пуçлăхĕн августăн 14-мĕшĕнчи 348-рг номерлĕ йышăнăвĕпе килĕшỹллĕн, Туктамăш ялĕнче çирĕплетнĕ карантина хупнă.

Выльăх чирĕсемпе кĕрешекен районти ветеринари станцийĕн ĕçченĕсем августăн 14-мĕшĕ тĕлне кайăк грипне тĕп тăвас тата ăна сарăлма парас мар тесе планпа пăхса хунă пур кирлĕ мероприятие те пурнăçларĕç. Республика Пуçлăхĕн йышăнăвĕнчи 2-мĕш пунктра ноябрĕн 14-мĕшĕччен Туктамăш ялĕнчен ытти хуçалăхсене çăмартапа чĕрĕ чăх-чĕп илсе тухма чарнине палăртнă.

Хальхи вăхăтра Чăваш Республикинчи чылай районсенчи пасарсенче чĕрĕ чăх-чĕпе сутма юрамасть. Çакă хăш-пĕр чăх-чĕп сутакансем РФ "Ветеринари çинчен" 4979-1 № саккунне тата ытти ветеринарипе санитари правилисене пăхăнманнипе çыхăннă. Çавăнпа та кайăк грипне, çавăн пекех сыснасен Африка чумипе çынсемпе выльăх сывлăхĕшĕн ытти сиенлĕ чирсене илсе кĕртес хăрушлăх пысăккипех сыхланса юлать-ха.

Выльăх чирĕсемпе кĕрешекен районти ветеринари станцийĕн тата унăн уйрăмĕсен ĕçченĕсем хальхи вăхăтра выльăх-чĕрлĕхсен хăрушă чирĕсем тĕлĕшпе лару-тăру мониторингне тăтăшах ирттереççĕ.

Лев ГУЩИН, выльăх-чĕрлĕх чирĕсемпе кĕрешекен районти ветеринари станцийĕн начальникĕ.