Сорăм ялĕнче çуралса ỹснĕ Петр Васильевич Ивантаев районта кăна мар, республикипех паллă çын, паллă обществăлла деятель. Кĕçех вăл хăйĕн 75 çулхи юбилейне паллă тăвать. Петр Васильевич Сорăм ялĕнче 1941 çулхи декабрĕн 19-мĕшĕнче хресчен çемйинче çуралнă. Пурнăç йывăрлăхĕсене çĕнтерсе пырса вăл малтан вăтам шкултан, ун хыççăн Чăваш патшалăх ялхуçалăх институтĕнчен вĕренсе тухнă. 1964 çулта районти "Октябрь" колхозра агрономра ĕçлеме тытăннă. Çар тивĕçне пурнăçланă хыççăн районти ялхуçалăх управленийĕнче ĕçе пикеннĕ. Яшăн пултарулăхне кура ăна "Октябрь" колхоза ертсе пыма суйланă. Вăл ертсе пынă 1965-1975 çулсенче хуçалăх производствăпа экономика кăтартăвĕсемпе районти чи лайăх хуçалăхсен йышне кĕнĕ. Вăл тăрăшнипе хута кайнă ăратлă сыснасен ферми республикипех палăрма пултарнă.

1973 çултан пуçласа Петр Васильевича тата яваплăрах должноçсем шанса пама тытăннă. Районти ялхуçалăх управленине ертсе пынă, КПСС-ăн Чăваш обкомĕн ялхуçалăх пайĕн инструкторĕнче, "Чувашхмельпром" пĕрлешĕвĕн начальникĕнче ĕçленĕ. Кунта вăй хунă хушăра, 1978-1981 çулсенче, Петр Ивантаев республикăра хăмла туса илессине пысăк тỹпе хывнă. Ĕç кăтартăвĕ - çĕршыв шайĕнче туса илнĕ пĕтĕм хăмлан 85 процентне, 3000 тонна хăмла, илме пултарнă. 1984-1994 çулсенче Чăваш Республикин профсоюзсен канашĕн тата Чăваш обкомĕн АПК-ра ĕçлекенсен профсоюз председателĕнче ĕçленĕ чух та вăл республикăра пурăнакансене ĕçлеме тата канма лайăх майсем туса парассине тỹпе нумай хывнă.

Петр Васильевичăн ĕçе йĕркелеме пĕлни, унăн опычĕ çĕршывăн кризислă тапхăрĕнче, 1998 çулта, питĕ кирлĕ пулнă. Ун чух вăл ЧР Министрсен Кабинечĕн Председателĕн пĕрремĕш çумĕ пулнă, 2000 çулта ăна ялхуçалăх министрĕ пулма шаннă. Çавăн чухне тивĕçлĕ мерăсем йышăннине пула чылай ялхуçалăх тата апат-çимĕçпе тирпейлекен предприятисене панкрута тухассинчен çăлса хăварма май килнĕ. Чылай хуçалăхра çĕр ĕçĕсене пурнăçланă чух, выльăх-чĕрлĕх ĕрчетес ĕçре хальхи йышши энерги перекетлекен технологисемпе усă курма пуçланă. Тивĕçлĕ канăва тухсан Петр Васильевич хăйне пĕтĕмпех обществăлла ĕç-хĕле халалланă. ЧР Президенчĕн Н.Федоровăн канашçи пулнă.

Пирĕн ентеш Петр Ивантаев "Чавал" ентешлĕхре те сахал мар ырă ĕç тунă. ЧНК вице-президенчĕ пулнă май вăл пур ĕçре те пултаруллă. Петр Ивантаев ЧР Патшалăх Канашĕн пĕрремĕш созывĕн депутачĕ пулнă, районти депутатсен пухăвне темиçе хут та суйланнă. Унсăр пуçне вăл - Çеçпĕл Мишин преми лауреачĕ, Чăваш Республикин Пуçлăхĕ çумĕнчи Аслисен канашĕн председателĕн çумĕ, ЧР Ялхуçалăх министерствин коллеги членĕ, çавăн пекех хамăр районăн тата Канаш районĕнчи Çеçпĕл ялĕн Хисеплĕ гражданинĕ. Çав хушăрах "Агропромышленность комплексĕн ветеранĕсен канашĕ" обществăлла организацие ертсе пыма та ĕлкĕрет, хăйĕн вăй-хăватне, опытне тата пĕлĕвне ветерансен юхăмне аталантарассине, канаш пайтаçисен сывлăхĕпе кун-çулне хỹтĕлеме, патшалăх органĕсемпе тачă çыхăнăва çирĕплетессине хывать.

1974 çулта Петр Васильевич республикăн экономикăпа социаллă аталанăвне пысăк тỹпе хывнăшăн "Хисеп палли" ордена тивĕçнĕ, каярахпа - медальсене, çĕршыв шайĕнчи хисеп грамотисене. Нумаях пулмасть вара Петр Васильевича ЧР Пуçлăхĕн хушăвĕпе Чăваш Республикин АПК аталанăвне пысăк тỹпе хывнăшăн тата общество ĕçĕнчи хастарлăхшăн "Тăван çĕршыв умĕнчи тава тивĕçлĕ ĕçсемшĕн" орденпа наградăланă. 75 çулхи юбилей умĕн çакă уншăн чи хаклă парне.

А.ДМИТРИЕВА.