Иртнĕ вырсарникун Шупашкарти Трактор тăвакансен Культура керменĕнче Ĕç çыннин çулталăкне тата республикăри Халăх пултарулăх çурчĕ 80 çул тултарнине халалласа икĕ пысăк мероприяти иртнĕ: пĕри - юрлакан коллективсен "Хавхаланса юрлать чĕре" республика фестивалĕ, тепри - республикăри ташă коллективĕсен "Анлă Атăл хĕрринче" фествиаль-конкурсĕ. Юрă юрлакансен фестивалĕнче 19 районтан килсе çитнĕ 33 чи лайăх ушкăн хутшăннă, вăл шутра пирĕн районти ветерансен хорĕ те (ертỹçи тата дирижер-хормейстерĕ - ЧР культурăн тава тивĕçлĕ ĕçченĕ Василий Романов). "Хор" номинацире ветерансен хорĕ фестивале активлă хутшăннăшăн тата халăхпа юр-лас пултарулăха тỹпе хывнăшăн лауреат Дипломне тивĕçнĕ. Ташă ăстисен фестиваль-конкурсĕнче пĕтĕмпе 59 хореографи номерĕ пулнă. Жюри вĕсенчен чи лайăххисене суйласа илнĕ. Районти "Колибри" ташă ансамбльне (ертỹçи Наталья Храмова) халăх хушшинче ташă пултарулăхне аталантарнăшăн Дипломпа чысланă.

 Районти паллă купăс ăстисем ноябрĕн 24-мĕшĕнче кỹршĕри Етĕрне районĕнче пулнă. Вĕсем Элĕк, Муркаш, Етĕрне районĕсенчи ытти купăсçăсем, пултарулăх коллективĕ-сем пекех Аркадий Айдак ячĕллĕ иккĕмĕш хут иртекен купăсçăсен тата тури чăвашсен такмакçисен "Выля, хуткупăс, янра, такмак!" фестиваль-конкурсне хутшăннă, "Купăссен музейне" çитсе курнă. Ку мероприятире пирĕн районтан икĕ дуэт хутшăнма кăмăл тунă - районти Культура çурчĕн ветерансен хорĕн хормейстерĕ Василий Романов тата Питĕркассинчи Культура çурчĕн заведующийĕ Георгий Ярлов, Серенкассинчи Культура çурчĕн пултарулăх ертỹçи Леонид Аргандейкин тата Ачкасси ял тăрăхĕн пуçлăхĕ Игорь Герасимов. "Купăсçăсем - ансамбльсем" номинацире вĕсем виççĕмĕш тата иккĕмĕш вырăнсене çĕнсе илнĕ. А.ДМИТРИЕВА.