Тури Çĕрпỹкасси ялĕнче çуралса ỹснĕ, хальхи вăхăтра Шупашкарта хореографа вĕренекен Ирина Романована хаçат вулакансем пĕлеççех. Ирина пĕлтĕр районта иртнĕ "Чутай Нарспийĕ" конкурсра çĕнтернĕччĕ. Хĕрсен район шайĕнчи ăмăртăвĕнче палăрнăскер, çулталăк вĕçĕнче Ирина "Чăваш пики-2015" конкурса та хутшăнчĕ. - Ирина республика шайĕнчи конкурсра та çухалса каймарĕ, 18 пике хушшинче хăйне тивĕçлĕ кăтартса пачĕ, - тет Чăваш наци конгресĕн районти уйрăмĕн ертỹçи Юлия Мареева.

- Панă ыйтусем çине те тĕрĕс хуравларĕ, хитре ташларĕ. Пуринчен те çамрăкрах пулни тата кăшт именни ăна ку хутĕнче малти вырăнсене тухма чăрмантарчĕ пулас, анчах та эпир пĕлетпĕр, шанатпăр - Иринăн пултарулăхне палăртасси малалла. Маттур хĕрачана ăнăçу сунатпăр.

А.ТИМОФЕЕВА.