Хирлỹкассинчи Николай Лисаев пĕтĕм пурнăçне, ĕç-хĕлне ялхуçалăхĕпе çыхăнтарнă. Вăрнарти ялхуçалăх техникумĕнчен вĕренсе тухнăскер, ĕç кун-çулне тăван колхозран пуçланă. Малтанах "Искра" хуçалăхра бригадирта, унтан 15 çул выльăх-чĕрлĕх комплексĕн управляющийĕнче вăй хунă. 1996-1997 çулсенче вăл республикăра "Чи лайăх ферма заведующийĕ" ята тивĕçнĕ. 2000 çултан пуçласа Туканашри чăх-чĕп фабрикине ертсе пынă. 2011 çулта вăл хресченпе фермер ĕç-хĕлне йĕркелесе янă. Хальхи пурнăçра техникăсăр май çуккине шута илсе çултан-çул техника паркне çĕнетсе, пуянлатса пынă. Тăватă çул хушшинче вăл хăйĕн пултаруллă та шанчăклă ĕçченĕсемпе пин гектар ытла пушă выртакан çĕре пусă çаврăнăшне кĕртнĕ, тыр-пул ỹстерсе илме тытăннă. Паян Николай Иванович - районти паллă фермерсенчен пĕри, тырă лайăх ỹстерсе илнипе палăрса тăрать. Кăçал фермер хуçалăхĕ пĕрчĕл- лĕ тата пăрçа йышши культурăсене 782 гектартан пухса кĕртнĕ, 1729 тонна (гектар пуçне 22 центнер) тĕштырă çапса илнĕ. 400 гектар лаптăкра кĕрхи культурăсене акса хăварнă. Ĕçлекен çын вара хисепе тивĕçлĕ. Унăн ĕçне ялхуçалăх ĕçченĕн уявĕн-че хакларĕç. Иртнĕ çул Николай Лисаев Чăваш Республикин Ялхуçалăх министерствин Хисеп грамотине, "Единая Россия" партин регионти уйрăмĕн Тав çырăвне тивĕçнĕ пулсан, кăçал вăл Раççей шайĕнчи наградăна - РФ Ялхуçалăх министерствин Тав çырăвне - илме тивĕçлĕ пулчĕ. А.ДМИТРИЕВА.