Ноябрĕн 18-мĕшĕнче районта Пĕрлехи информаци кунĕ иртрĕ. Пирĕн района Чăваш Республикин тĕрĕслевпе шутлав палатин председателĕ Татьяна Минина ертсе пыракан информаци ушкăнĕ килсе çитрĕ. Информаци кунĕнче тишкернĕ темăсене тĕплĕнрех уçăмлатма шăпах унран, Чăваш Республикин тĕрĕслевпе шутлав палатин председателĕнчен Татьяна Мининаран ыйтрăм. Татьяна Минина, информаци ушкăнĕн ертỹçи, ЧР тĕрĕслевпе шутлав палатин председателĕ:

Çитес çул - Ĕç çыннин çулталăкĕ

- Обществăра ĕçе тата ĕç çыннине хисепленине çирĕплетес, ĕç-хĕл валли конкурентлă ырă условисем йĕркелес тĕллевпе республика Пуçлăхĕн Михаил Игнатьевăн 2015 çулхи сентябрĕн 7-мĕшĕнчи Указĕпе Чăваш Республикинче 2016 çула Ĕç çыннин çулталăкĕ тесе пĕлтернĕ. Пирĕн республикăра пурă-накансем яланах хăйсен ĕçченлĕхĕпе палăрнă. "Ĕçчен çын ĕмĕр мухтавра" тенĕ ваттисем. Статистика кăтартăвĕсем тăрăх, 2014 çулта вăтамран 560 пин ытла çын ĕçленĕ, вĕсенчен 132 пинĕ - пысăк тухăçлă ĕç вырăнĕсенче. Юлашки пилĕк çулта вăтам ĕç укçи республикăра 60,4 процент ỹснĕ. Халăхăн тупăшĕ ỹсессипе пирĕн республика Атăлçи федераци округĕнче иккĕмĕш вырăн йышăнать. 2002 çултанпа республикăра ĕç династийĕсене чыслаççĕ. 2015 çул пуçланнăранпа 38125 çынна ĕçе вырнаçтарнă (ĕç шыраса пынисенчен 82,6 проценчĕ). Çамрăксене ĕçе вырнаçтарассипе активлă ĕçлеççĕ. Çитес çул Ĕç çыннин çулталăкне ирттерме Министрсен Кабинечĕ ятарлă план çирĕплетнĕ. Унпа килĕшỹллĕн çитес çул 80 мероприяти ирттерме палăртнă, вĕсем виçĕ енлĕн пурнăçланса пырĕç. Пĕр енĕпе производствăна прогрессивлă технологисене кĕртĕç, ĕçченсен квалификацине ỹстерĕç, çĕнĕ ĕç вырăнĕсем хатĕрлĕç, инвестици проекчĕсен конкурсне ирттерĕç. Иккĕмĕш енĕпе ачасемпе çамрăксене професси суйласа илме пулăшас тесе Пĕрлехи профориентаци кунне ирттерĕç, ĕç çыннине мухтакан электронлă альбомсемпе кĕнекесем кăларĕç, профессире чи лайăххисен конкурсне ирттерĕç. Çавăн пекех инвалидсене ĕç вырăнĕсемпе тивĕçтерессине те тимлĕх уйăрĕç. Планăн виççĕмĕш енĕ вара Ĕç çыннин çулталăкĕнче туса ирттерекен мероприятисене массăллă информаци хатĕрĕсенче çутатассипе çыхăннă. 2016 çулта Ĕç çыннин çулталăкне ирттерни республикăра пурăнакансен активлăхне ỹстерме, çитĕнекен ăрăва ĕçе хисеплеме вĕрентме пулăшать, çавăн пекех социаллă задачăсем те пурнăçланса пырĕç.

Декабрĕн 14-мĕшĕ - граждансене йышăнмалли кун

- Кăçалхи декабрĕн 14-мĕшĕнче Пĕтĕм Раççейри граждансене харпăр хăй ыйтăвĕсемпе йышăнмалли кун иртет. Асăннă кун граждансем 12 сехетрен пуçласа 20 сехетчен Раççей Президенчĕн республикăри йышăну пỹлĕмне, республикăри патшалăх тата вырăнти хăйтытăмлăх органĕсене ыйтусемпе тухма пултараççĕ. Йышăнăва кайнă чухне граждансен пĕрле паспорт илмелле.

2016 çулта Пĕтĕм Раççейри ялхуçалăх çыравĕ иртет

- Çитес çул пирĕн çĕршывра ялхуçалăх çыравĕ иртет. Ăна ялхуçалăхĕ пирки актуаллă информаци пухса малалла аталанма майсем туса парас тĕллевпе ирттереççĕ. Районта 15 çынран тăракан çырав комиссине йĕркеленĕ, вăл ятарлă планпа килĕшỹллĕн ĕçлет. Хальхи вăхăтра çырава хатĕрленес ĕçсем пурнăçланаççĕ. Ялхуçалăх объекчĕсен списокĕнче _ 10098 уйрăм хушма хуçалăх, 7 ялхуçалăх организацийĕ, 13 микропредприяти, 29 фермер (хресчен) хуçалăхĕ, 19 уйрăм предприниматель. Ноябрь уйăхĕнче инструкторсен тăватă участокне тата 22 шутлав участокне йĕркеленĕ.

А.ОРИНОВА.