“Свобода” колхоз çулленех тухăçлă тыр-пул пуçтарса илет. Иртнĕ çул ял ĕçченĕсем кашни гектартан 23 центнера яхăн пухса кĕртнĕччĕ. Кăçалхи тухăç та япăх мар. Акă, тулă 24-шар тухнă. Хуçалăхра паянхи кун тĕлне 310 гектар пĕрчĕллĕ тата пăрçа йышши культурăсене тĕшĕленĕ. Çапла вара 520 тонна таса тырă кĕлете кĕртнĕ. Çав шутран тулă – 444 тонна, урпа – 600 тонна.

– Колхозра вырма ĕçĕсем вĕçленнĕпе пĕрех, – тет хуçалăх ертÿçи В.Бромбин. – Геннадий Кокаревпа Иван Бурин механизаторсем шанса панă комбайнпа туллин усă курма тăрăшрĕç. Çут çанталăк кăларса тăратнă йывăрлăхсене парăнмасăр тырра тăккаламасăр вырса пуçтарчĕç.

Уй-хиртен илсе килнĕ ял хуçалăх культурисене йĕтем çинче тасатассине те аван йĕркеленĕ. Станислав Терентьевпа Валерий Кумашкин машинистсем агрегатсене юсавлă тытнипе ĕç хăвăртлăхĕ лайăх пулса пынă.