Учитель пулса ĕçлеме пĕрре те çăмăл маррине Хĕрлĕ Чутай салинче пурăнакан Наталья Владиславовна Абакумова (хĕр чухнехи хушамачĕ Егорова) ача чухнех пĕлсе ÿснĕ. Мĕншĕн тесен унăн кукамăшĕ те, Раиса Степановна Жигулева (биологи предметне вĕрентнĕ), амăшĕ те, Надежда Геннадьевна Егорова (истори, географи предмечĕсене вĕрентнĕ) педагогсем пулнă. Наташа та аслисем пекех вĕсен çулне суйласа илнĕ, пурнăçне ачасене тивĕçлĕ пĕлÿпе воспитани парас ĕçпе çыхăнтарнă. Сăмах май, Наталья Владиславовнан аппăшĕ те, Светлана, учитель профессине суйласа илнĕ.

Н.В.Абакумова Хĕрлĕ Чутай вăтам шкулĕнче ăс пухнă. Ача чухнех ют чĕлхе предметне кăмăлланă хĕр. Ĕмĕтне пурнăçа кĕртес тесе Наталья Владиславовна Чăваш патшалăх педуниверситетне вĕренме кĕрет. 2006 çулта алла диплом илсен хĕр тăван тăрăха, хăй вĕреннĕ шкула ĕçлеме таврăнать. Иккĕмĕш çул ĕнтĕ çамрăк специалист Хĕрлĕ Чутай вăтам шкулĕнче кĕçĕн тата аслă классенчи ачасене ют чĕлхесен илемлĕхне туйма, ăша хывма вĕрентет.