Сăвă кĕнекисен презентацийĕ иртнĕ
Республикăра иртекен «Литературная Чувашия: самая читаемая книга года» литература конкурсĕ шайĕнче çак кунсенче районти ял тăрăхĕсем хушшинчи тĕп библиотекăра «Литературная Чувашия: книга года – 2006» кĕнеке куравне пăхса тухнă, Хĕрлĕ Чутай тăрăхĕнче çуралса ÿснĕ Николай Сергеевăн 2006 çулта кун çути курнă «Весна обручальная» тата «Возвращение» сăвă кĕнекисен презентацине ирттернĕ.
Асăннă мероприятие В.Иванова вĕрентекен ертсе пынипе Хĕрлĕ Чутайри вăтам шкулăн 7-мĕш класĕнче вĕренекенсем хутшăннă, вĕсем поэтăн сăввисене чăвашла тата вырăсла вуланă. Н. Сергеевăн пурнăçĕпе тата пултарулăхĕпе тĕп библиотекăн кĕнекесемпе тивĕçтерекен пайĕн заведующийĕ Е. Чубайкина паллаштарнă.
Палăртмалла, Н.Сергеев – Писательсен союзĕн членĕ. Унăн сăввисем хăйне евĕрлĕхпе палăрса тăраççĕ. Поэтăн хăйĕн чĕлхи, хăйĕн стилистики. Сăмах май, «Весна обручальная» кĕнекери сăвăсем икĕ чĕлхепе тухнă. Вĕсене вырăсларан чăвашла Хветĕр Акивер поэт куçарнă.
"Пирěн пурнăç"