Хальхи вăхăтра районта “Çамрăксем сывă пурнăç йĕркишĕн” çулленхи акци пырать. Вăл кăçалхи апрелĕн 30-мĕшĕччен тăсăлать. Ку таранччен пур вĕрентÿ учрежденийĕсенче те сывлăх урокĕсене ирттернĕ. Çавăн пекех аслă классенче вĕренекенсене пирус туртнин, наркотиксемпе эрех сиенĕ çинчен ытларах пĕлме пулăшас тĕллевпе тематика каçĕсем, диспутсем, калаçусем, викторинăсем, класс сехечĕсем йĕркелеме палăртнă. Çул çитмен çамрăксемпе ĕçлекен комисси членĕсемпе тĕп больницăн медицина ĕçченĕсем йывăр лару-тăрăва кĕрсе ÿкнĕ çемьесенчи право йĕркине пăсма пултаракан çамрăксемпе тĕл пулусем ирттереççĕ.

Ачасемпе çамрăксен спорт шкулĕнче волейболла, шашка-шахматла, сĕтел çи теннисне выляссипе йăлана кĕнĕ турнирсем пулаççĕ. Ачасен каникул кунĕсенче “Хаваслă старт” тата ытти спорт ăмăртăвĕсем йĕркелеççĕ.

Тĕслĕх библиотекăсенче тата культура çурчĕсенче тематикăллă кĕнеке куравĕсем ĕçлеççĕ. Районти вĕрентÿ пайĕ шкула çÿрекенсем валли “Эпĕ пирус туртмастăп, ку питĕ лайăх!” электронлă плакатсен конкурсне йĕркеленĕ.