Семинар-канашлăва райадминистрацин пуçлăхĕ А.И.Криков, Чăваш Республикин ял хуçалăх министерствин специалисчĕсен пысăк ушкăнĕ, ăслăлăх учрежденийĕсен представителĕсем, район пуçлăхĕсен АПК аталанăвĕшĕн яваплă çумĕсем, ял хуçалăх кооперативĕсен ертÿçисем тата ыттисем те хутшăнчĕç.

Пухăннисем чи малтанах Атнарти автотранспорт паркĕнче йĕркеленĕ çĕнĕ ял хуçалăх куравĕпе паллашрĕç. Курава энергоресурс перекетлекен пурĕ 40-е яхăн техника тата çĕр хатĕрлекен агрегат тăратнă. Хуçалăхсене çĕнĕ техникăпа тивĕçтерсе тăрассипе тимлекен фирма представителĕсем кураври “хурçă утсемпе” паллаштарчĕç, вĕсен ĕç тухăçлăхĕ çинче тĕплĕн чарăнса тăчĕç, вăхăта тата çунтармалли-сĕрмелли материалсене перекетлес, тупăшлă ĕçлесе пырас тесен çĕнĕ йышши техникăпа ытларах усă курмаллине каларĕç.

ЧР ял хуçалăх министрĕ М.В.Игнатьев специалистсене “Коминтерн” хуçалăхпа тĕплĕнрех паллаштарма сĕнчĕ. Сăмах май, атнарсен кăтартмалли, мухтанмалли пурах ĕнтĕ: хуçалăхри пĕтĕм ĕçе механизациленĕ, сысна комплексĕпе ĕне фермисене çĕнĕ технологипе ĕçлеттереççĕ тата ытти те. Семинар-канашлăва килнисем Туканашри сысна ферминчи, ĕнесен комплексĕнчи çĕнĕлĕхсене курса çÿрерĕç, “Коминтернран” чăнах та ырă тĕслĕх илмелли пуррипе тĕлĕнчĕç.

Семинар-канашлăвăн иккĕмĕш пайĕ Атнарти Культура çуртĕнче иртрĕ. М.В.Игнатьев калаçăва хуçалăхсене паха вăрлăхпа тивĕçтересси, минерал удобренийĕсем, топливо кÿрсе хурасси, техникăна юсаса хатĕрлесси тата ытти ыйтусенчен пуçларĕ. Вăл нумай пулмасть ЧР Президенчĕ Н.Федоров республика правительствин территори органĕсен ертÿçисемпе ирттернĕ канашлура Чăваш Енре усă курман çĕрсем пулмалла марри пирки çивĕч калаçнине пĕлтерчĕ. Çитес çур акинчен пуçласа пăрахăçа кăларнă усă курмалли çĕрсене хуçалăх çаврăнăшне кĕртессине йĕркелеме чĕнсе каларĕ. Ăна пурнăçлама пысăк, хăватлă техникăпа, пĕр харăсах темиçе тĕрлĕ ĕç тăвакан агрегатсемпе анлă усă курма сĕнчĕ.

Çĕр те хăйне пăхнине юратать, вара тупăшĕпе савăнтарать. Тăпра пулăхне ÿстермелли, ÿсен-тăрана вăй илсе çитĕнме минерал удобренийĕ çителĕклĕ хывмалли, пахалăхлă вăрлăхпа тата пысăк тухăç паракан малашлăхлă сортсемпе ытларах ĕçлемелли, вĕсене наука учрежденийĕсенче туянмалли, çĕр ĕçĕнче çĕнĕ технологисемпе усă курмалли çинчен ЧР ял хуçалăх министерствин çĕр ĕçĕ тата инноваци пайĕн начальникĕ А.А.Самаркин, ЧР “Агро-Инновацисен” унитари предприятийĕн директорĕ Н.И.Васильев, “Россельхозцентр” ФГУ-н Чăваш Республикинчи филиалĕн ертÿçи Н.П. Якимов, çур акине пахалăхлă тата вăхăтра ирттерес ĕçре техника юсавлăхĕ пысăк вырăн йышăнни пирки патшалăх техника асăрхавĕн Чăваш Енри начальникĕ В.П.Дмитриев тухса калаçрĕç. “ЧР апат-çимĕç фончĕ” унитарлă предприятийĕн директорĕ Ю.Е.Федоров хуçалăхсем туса илнĕ продукцие вырнаçтарса пулăшма яланах хатĕрри çинчен сăмах хускатрĕ.

“Коминтерн” ЯХПК ертÿçи А.Б.Новикова республика шайĕнчи канашлăва хуçалăхра ирттерни чыс кÿнине палăртрĕ, ял хуçалăх кооперативĕн юлашки çулсенчи аталанăвĕпе тĕплĕнрех паллаштарчĕ.

– “АПК аталанăвĕ” наци проектне вăхăтра пурнăçа кĕртсе пыратпăр, унсăрăн экономикăна аталантарма йывăр пулĕччĕ. Халăхпа тимлĕ ĕçлемелле, вара ÿсĕм пулатех, – терĕ Альбина Борисовна.

Семинар-канашлăвăн ĕçне ЧР ял хуçалăх министрĕ М.В.Игнатьев пĕтĕмлетрĕ, çĕр ĕçченĕсене акана лайăх хатĕрленсе ирттерме, хĕрÿ вăхăтра техникăна кăлтăксăр ĕçлеттерме, пушă çĕрсене майĕпен ĕçе кĕртсе пыма ăнăçу сунчĕ.