– Çĕрпÿри ял хуçалăх техникумĕнчен вĕренсе тухса алла техник-механик специальноçне илнĕ хыççăн мана Хĕрлĕ Чутайри вăтам шкула ял хуçалăх техникине вĕрентме ячĕç, – аса илет халĕ Юрий Егорович. – Ун чухне ачасене пĕлÿ пама ял хуçалăх специалисчĕсем çитмен. Çакна шута илсе техникумра лайăх ĕлкĕрсе пынă темиçе çамрăка ялсенчи шкулсене ĕçлеме кайма тÿр килчĕ.

Вăл тĕрлĕ çулсенче райĕçтăвком председателĕн çумĕ, КПСС райкомĕн пропагандăпа агитаци пайĕн пуçлăхĕ, статистика пайĕн начальникĕ, культура пайĕн заведующийĕ пулса ĕçлерĕ. Кирек хăçан та умри тĕллеве чыслăн пурнăçлама тăрăшнă. Яланах халăхпа çывăх пулнă. Ĕç çыннисен ыйтăвĕсене татса парассишĕн пĕлĕвне те, вăй-халне та шеллемен.

...Ю.Егоров Вăрнар районĕнчи Кивĕ Хирпуçĕнче çуралнă. Ялти çичĕ класлă шкултан вĕренсе тухсан, Уравăша вăтам пĕлÿ илме çул тытнă. 60-мĕш çулсенче директорта Георгий Сидоров (хыççăн вăл педагогика институчĕн ректорĕ пулнă) тăрăшнă. Вăл ытти учительсемпе пĕрле ачасен пĕлĕвне ÿстерессишĕн, çĕршыва юрăхлă çынсем хатĕрлессишĕн тимленĕ. Кунпа пĕрлех чăваш юрри-ташшисене, сăмахлăхне, йăли-йĕркине хисеплеме, юратма хăнăхтарнă.

Шкулта пĕлÿ пухнă çулсенче Юрий Егоровăн юрлас-ташлас ăсталăхĕ палăрнă. Вăл асатте-асаннесен юррисене хаваспах шăрантарнă, кĕвви-çеммисене киленсе итленĕ. Аттестат илсен çамрăк Санкт-Петербургри театр институтне кĕме шухăшланă, унта хăйĕн докуменчĕсене ярса панă. Пыма чĕнсе хут та килнĕ. Анчах та укçа-тенкĕ çитменни инçе çула тухма чăрмантарнă. Ачаран чăн-чăн юрăç, артист пулма ĕмĕтленнĕскер шанчăка çухатмасть-ха: Шупашкарти Ф.Павлов ячĕллĕ музыка училищине васкать. Кунта вара экзаменсем вĕçленнĕ иккен. Çĕрпÿри культурăпа çутĕç училищине те çитет вăл. Кунтан ăна «Кая юлтăн, йышăнса пĕтернĕ» – тесе ăсатнă.

Чăваш драма театрĕ «Чапаев» оперăна лартма талантлă çынсене йыхравлани çинчен пĕлсен, вăл унта васкать. Жюри пухăннисене пĕрерĕн-пĕрерĕн чĕнсе юрлаттарать, ташлаттарать. Юлашкинчен ăна театра йышăнасси çинчен пĕлтереççĕ. Ку çамрăк чун-чĕринче пысăк шанчăк çуратать. Анчах... ир такăнсан – каçченех иккен.

– Пичче эпĕ ĕçлессине хирĕçлерĕ, – тет Юрий Егорович. – Вăл мана малалла вĕрентесшĕн пулчĕ. Çапла вара ял хуçалăх техникумĕн вĕренекенĕ пулса тăтăм.

Кивĕ Хирпуç каччи кирек ăçта та юрă-ташăран аякра тăман. Çак туртăм мĕн пĕчĕкрен чун-чĕрине кĕрсе вырнаçнă теме пулать. Вĕсен тăван-пĕтенĕсем юрă-ташăра чăннипех те пултаруллă пулнă. Аслă вăрçа хутшăннă Хĕлĕп пиччĕшĕ ку енĕпе уйрăмах хастарлăх кăтартнă. Амăшĕ, Варвара Николаевна, балалайкăпа вылянă.

– Эпир, тăватă ачи, юрă-кĕвĕ тĕнчинче ÿсрĕмĕр, – пĕлтерет Юрий Егорович. – Ăсталăха куллен тенĕ пек аталантарса пытăмăр. Мĕн сасă тухнă таран кăшкăрса юрлани халĕ те асра-ха. Юрăç профессине алла илеймерĕм пулин те пушă вăхăтра яланах сцена çине тухма тăрăшнă.

Хĕрлĕ Чутайри учительсен хорне Александр Ильич Стекольщиков ертсе пынă çулсенче вăл нумай концертсене хутшăннă. Коллектив «халăх хорĕ» ята тивĕçнĕ. Çакăнта Юрий Егоровичăн тÿпи те пĕчĕк мар. Вăл малтанах хорта юрланă, кайрантарах унăн солисчĕ пулнă. Чулхулари партин Аслă шкулĕнче вĕреннĕ вăхăтра хулари консерваторие çÿренĕ, юрлас ăсталăха ÿстернĕ. Художество пултарулăх ушкăнне ертсе пынă, тĕрлĕ конкурссене хутшăнса темиçе хут та лауреат ятне çĕнсе илнĕ.

Сĕтел çинче – Хисеп грамотисем, Тав çырăвĕсем, парнесем... Хăшĕ чи хакли-ши;

– Кĕçĕн класра вĕреннĕ чухне Çĕнĕ çул уявĕнче тухса юрланăччĕ. Çакăншăн преми вырăнне виçĕ-тăватă канфет пачĕç. Çав тери хĕпĕртенĕччĕ, юрлас кăмăл çĕкленсе кайнăччĕ.

Пирĕн районта Юрий Егоровича пĕлмен-палламан çынсем сахал пулĕ. Вăл пуриншĕн те яланах чăн-чăн артист, пултаруллă юрăç. Вăл чăваш, вырăс халăх юррисене шăрантарса ярсан кирек камăн та чунĕ çĕкленсе-хăпартланса кайĕ. Чăваш композиторĕсем Г.Лебедев, А.Никитин, Ю.Кудаков кĕвĕленĕ юрăсем те унăн чунне çывăх. Анатолий Никитинăн «Хамăр яла таврăнсан» юррине вăл ăçта кăна халăх патне çитермен-ши. Кирек хăçан та çак юрă çăмăллăн, çĕкленÿллĕн янăрать.

Чăваш çĕршывĕн çĕр пин юрă, çĕр пин ташă, çĕр пин тĕрĕ теççĕ. Çакăн пек пуянлăха ÿстерсе пырассишĕн вăй-халĕсене шеллемеççĕ те ĕнтĕ пирĕн пултарулăх ăстисем. Вĕсем хушшинче, малти ретрех-и, тен, Юрий Егорович Егоров юрăç, Хĕрлĕ Чутайри ветерансен хорĕн солисчĕ тăрать.