Д.А.Медведев: «Чăваш Республики вĕрентÿпе сывлăх сыхлавĕнче малта пыракансен йышĕнче, унăн ку енĕпе кăтартмалли пур. Ытти регионсем те вырăнти конкретлă ĕç условийĕсене кура çак паха опытпа усă курма пултарччăр».

2008 çулхи февралĕн 4-мĕшĕнче Раççей Федерацийĕн Правительствин пĕрремĕш çумĕ Дмитрий Медведев приоритетлă наци проекчĕсене тата демографи политикине пурнăçлас тĕлĕшпе мĕнле ĕçлени çинчен Раççей Президенчĕ çумĕнчи президиум Канашĕн ларăвне ирттернĕ. Президиум Канашĕн членĕсем регионсенчи вĕрентĕвĕн комплекслă проекчĕсене тата сывлăх сыхлавĕн пилотлă проекчĕсене модернизацилес ыйтусене сÿтсе явнă.

Ларăва уçса пĕрремĕш вице-премьер вĕрентÿпе сывлăх сыхлавĕн регионсенчи проекчĕсем пĕтĕмĕшле социаллă сферăна аталантармалли стратегине хатĕрленĕ çĕрте питĕ кирлине палăртнă. Вĕрентĕве модернизацилемелли комплекслă проектсене пурнăçлас тĕлĕшпе аван ĕçлекен регионсенче шкулсен пурлăх никĕсĕ лайăхланнă, вĕрентекенсен тупăшĕ ÿснĕ, пĕтĕмĕшле пĕлÿ паракан учрежденисем хушшинчи сывă тупăшу условийĕсем çуралнă.

Дмитрий Медведев вĕрентĕвĕн тулашри пахалăхĕ çине тимлĕрех пăхмалли, çак сферăна модернизацилес ĕçри тĕп тĕллев – Раççейри мĕнпур ачасене, вĕсем ăçта пурăннине пăхмасăр, пахалăхлă пĕлÿ парасси çинчен каланă.

Регионсенчи сывлăх сыхлавĕн пилотлă проекчĕсем пирки пĕлтернĕ май, пĕрремĕш вице-премьер ĕçлĕрех çынсене тÿлевсĕр медицина пулăшăвĕ пани тата медицина ĕçченĕсен ĕç укçине ÿстерни пысăк пĕлтерĕшлĕ пулнине палăртнă.

Дмитрий Медведев сывлăх сыхлавне укçа-тенкĕпе тивĕçтермелли çĕнĕ системăна ĕçе кĕртнĕ чухне тухса тăракан задачăсене татса памалла, тенĕ. Медицина пулăшăвĕ парас, профилактика ĕçне аталантарас, страхполиссемпе ирĕклĕ усă курас тата медицина учрежденийĕсен хăй тĕллĕнлĕхне сарас тĕлĕшпе пĕрлĕхлĕ виçене ĕçе кĕртмелле.