Район уявĕсене хатĕрленсе ирттерес енĕпе ĕçлекен комитет членĕсем çак кунсенче черетлĕ ларăва пухăнчĕç. Ăна район пуçлăхĕн пĕрремĕш çумĕ А.П.Самылкин ертсе пычĕ. Чи малтанах Александр Петрович рейд ирттернĕ хыççăнхи пĕтĕмлетÿсем çинче чарăнса тăчĕ, уява хатĕрленес тĕлĕшпе предприяти-организацисем япăх ĕçленине палăртрĕ, вĕсен ертÿçисем, унти специалистсем çитменлĕхсене пĕтерессишĕн тăрăшманни çинчен пăшăрханса калаçрĕ. Акă, “Сура-Çĕмĕрле” автоçул хĕррипе вырнаçнă предприятисен вывескисем çуккине асăнчĕ. “Асамат”, “Агроснаб”, “Электричество сечĕсем”, “Сельхозэнерго” предприятийĕсен ертÿçисем темиçе хутчен те асăрхаттарнă пулин те хăйсен территорийĕсенче йĕрке тăвассипе тăрăшмаççĕ. Çавăн пекех предпринимательсен лавккисем умĕнче тасамарлăха асăрхама пулнине асăнчĕç.

Социаллă аталану пайĕн начальникĕ А.Н.Самсонов уяв программин кашни саманчĕпе тĕплĕн паллаштарчĕ, унтах вырăнти ал ĕç ăстисен куравĕсене, фотостендсене пуян хатĕрлемеллине палăртрĕç, пысăк уява кÿршĕ районĕнчи пултарулăх ушкăнĕсене явăçтарасси пирки те сăмах пычĕ.

Ларăва Александр Петрович пĕтĕмлетрĕ, уявсене хатĕрленсе ирттерессипе çине тăрса ĕçлеме, тирпей-илемшĕн тăрăшма чĕнсе каларĕ.