Чутай ен хăйĕн пысăк уявĕсене - район 80 çул, Хĕрлĕ Чутай сали 425 çул тултарнине уявлама хатĕрленет. Иртнĕ эрне кун район пуçлăхĕн пĕрремĕш çумĕ А.П.Самылкин ертсе пынипе район уявĕсене хатĕрленсе ирттерес енĕпе ĕçлекен йĕркелÿ комитечĕн черетлĕ ларăвĕ иртрĕ. Йĕркелÿ комитечĕн членĕсем Хĕрлĕ Чутай ял тăрăхĕнче вырнаçнă предприяти-организацисене çитсе курчĕç, уява хатĕрленсе мĕнле ĕçсем пурнăçланине пăхса тухрĕç, çитĕнÿсемпе çитменлĕхсене палăртрĕç. Калас пулать, уява хатĕрленсе вĕсем сахал мар ĕçсем тунă, анчах пурнăçламалли те чылай. Йĕркелÿ комитечĕн ларăвне хутшăннисем шăпах вĕсене тĕплĕн тишкерчĕç, хальтерех татса памалли ыйтусене сÿтсе яврĕç. Вĕсенчен пĕри - йĕри-тавра хыт-хура, вĕлтрен, хупах йышши курăксем чылай пулни, вĕсене тирпейлессипе япăх ĕçлени чуна ыраттарать. Çавăн пекех чылай çĕрте урам енчен киввине çĕнетсе улăштарассипе васкамаççĕ, сăн-сăпат кĕртмеççĕ. Ун пеккисене вăхăт кăтартса çирĕп асăрхаттарса хăварчĕç.

Çапла вара, июлĕн 15-мĕшĕччен кашни предприяти-организацин хăйсен территорийĕсенче йĕрке туса çитермелле, ялта пурăнакансен хăйсен кил-çурчĕ умĕнче тасатса тирпейлемелле. Асра тытмалла, йĕркене пăхăнманнисенчен çирĕп ыйтаççĕ.