Иртнĕ эрнере Раççей потребитель обществин Центросоюзĕн  канашĕн пуçлăхĕ Е.Кузнецов ĕçлĕ визитпа Чăваш Республикинче пулчĕ. Чăваш Ен - çĕнĕ ертÿçĕн ĕç-хĕлне çитсе курнă пĕрремĕш регион. Евгений Николаевич ку должноçра çу уйăхĕн 30-мĕшĕнчен ĕçлеме тытăннă.

Е.Кузнецов Шупашкарти коопераци институчĕн ректорĕпе В.Андреевпа, Чăвашпотребсоюз канашĕн председателĕпе В.Павловпа тата яваплă ытти çынпа Элĕк, Муркаш, Етĕрне районĕсенче пулса потребитель организацийĕсен ĕç-хĕлĕпе паллашнă. Хаклă хăна çавăн пекех Шупашкарти коопераци институтĕнче те пулчĕ. Малтанах вăл аслă шкулăн библиотекипе паллашрĕ. Ăна студентсен расписанине интерактивлă шыравпа тупма май пурри кăсăклантарчĕ. Çавăн пекех Евгений  Николаевич регионти потребитель кооперацийĕсен пÿлĕмĕпе, информаци технологийĕсен, тĕпчев лабораторийĕн центрĕпе, коопераци музейĕпе, чăваш чĕлхин пÿлĕмĕпе, дисплей класĕпе, лекци залĕпе тĕплĕн паллашрĕ. Çакăнта курни ăна кăшт тĕлĕнтернине те пытармарĕ вăл: “Эпĕ çакна кĕтмен. Пĕр иккĕленмесĕрех калатăп: институт студенчĕсене вĕренме условисем туса панипе, тĕрлĕ техника, оборудовани пуянлăхĕпе Мускаври аслă шкулсенчен пĕрре те кая мар. Коопераци институчĕ - пирĕн отраслĕн аслă шкулĕ пулнине йышăнма питĕ кăмăллă”. Чăвашпотребсоюз та, институт та тухăçлă ĕçлени вĕсен ертÿçисенчен, вырăнти влаç тытăмĕнчен чылай килнине те палăртрĕ Е.Кузнецов.

Мускав хăни ĕçлĕ визитпа чи малтан Чăваш Ене килни ахальтен мар. “Чăваш Ен тĕрлĕ кăтартупа лайăххисен шутĕнче, çав шутра - потребитель кооперацийĕсен ĕç-хĕлĕпе те. Малашне ытти региона кайсан танлаштарма, Чăваш çĕршывне тĕслĕх вырăнне кăтартма пулĕ”.