Иртнĕ эрне кун райадминистрацин Пĕчĕк залĕнче августăн 18-мĕшĕнче иртекен пысăк  уява - район йĕркеленнĕренпе 80 çул тата Хĕрлĕ Чутай салине 425 çул çитнине - хатĕрленсе ирттерес тĕлĕшпе йĕркеленĕ комитет черетлĕ ларăва пухăнчĕ. Ăна район пуçлăхĕн пĕрремĕш çумĕ, райадминистрацин ял хуçалăхпа экономика, пурлăх тата çĕр хутшăнăвĕсен пайĕн начальникĕ А.П.Самылкин ертсе пычĕ. Александр Петрович çак хушăра район центрĕнчи предприятисемпе организацисен территорийĕсенче палăрмаллах улшăнусем пурри курăнманнине çирĕплетрĕ, уявччен вăхăт сахал юлнине, тивĕçлĕн хатĕрленес тесен йĕрке тумаллине пĕлтерчĕ.

Унтан район пуçлăхĕн çумĕ, обществăлла инфратытăм аталанăвĕн тата пурăнмалли çурт-йĕрпе коммуналлă хуçалăх ыйтăвĕсемпе ĕçлекен пайĕн начальникĕ И.Л.Хораськин сăмах илчĕ. Иван Лаврентьевич иртнĕ ларура кашнин пурнăçламалли ĕçсене тĕплĕн тишкерсе тухнине аса илтерчĕ, апла пулин те чылайăшĕ ĕçе пуçăнманнине пĕлтерчĕ. Акă, тĕслĕхрен, çыхăну уйрăмĕн тата “Волгателеком” УАО-н районти филиалĕн ĕçченĕсем тирпей-илем ыйтăвĕпе, юсав тăвассипе васкамаççĕ-ха.  Райпо ку тĕлĕшпе ырă тĕслĕх кăтартать. Суту-илÿ çурчĕн, 2 № гастрономăн сăнĕсем часах илемленеççĕ. Шалти ĕçсен пайĕ умĕнчи сăнчăртан тунă картана  пуçтармаллине палăртрĕ Иван Лаврентьевич, çавăн пекех кунта халăх кĕмелли тĕп вырăна тата çутă тăвассине йĕркелемелле. Халăх сучĕн çурчĕ умĕнчи картасене вара шаларах куçарма, туя йывăççисене территоринелле куçарса лартма тивет иккен, унта тротуар тăвасшăн. Районти тĕп больница ĕçченĕсем нимех те туманни çинчен пăшăрханса калаçрĕ И.Л.Хораськин. 23 № аптекăн урамра çутă тăвассипе ĕçлемелле. Выльăх-чĕрлĕх чирĕсене хирĕç кĕрешекен станци хальлĕхе вывескине çеç ылмаштарнă. Хĕрлĕ Чутай ял тăрăхĕн çурчĕн нимĕнле улшăну та çуккине палăртрĕç. Кунта çывăхра вырнаçнă РОСТО организацийĕ тата музей кирлĕ ĕçсене пурнăçлаççĕ-ха, анчах та Етĕрнери лицейăн районти филиалĕ вĕсем хушшинче илемсĕр курăнса ларать. Çавăн пекех Иван Лаврентьевич автовокзал территорине генеральнăй директорĕпе пĕрле пăхса тухсан вăл йĕрке кĕртме шантарнине каларĕ. Пĕтĕмĕшле илсен, Иван Лаврентьевич шăпах ларăва килсе çитмен ертÿçĕсем тирпей-илем ыйтăвĕ çине сÿрĕккĕн пăхнине çирĕплетрĕ. Акă, тĕслĕхрен, ветстанцин, “Сельхозэнерго”, ДРСУ, “Хĕрлĕ Чутайри КСО” ХАО, “Янтарь” ТЯО, çăкăр завочĕн... ертÿçисем ларăва килмен. И.Л.Хораськин малашне тирпей-илем кĕртес, йĕрке тăвас енĕпе вырăнтан тапранман ертÿçĕсене пухма сĕнчĕ. Унтан Иван Лаврентьевич кашни предприятипе организацин тенĕ пекех урамра çутă тăвассипе, вывескăсем çакассипе ĕçлемеллине палăртрĕ.

А.П.Самылкин ял тăрăхĕсем хушшинчи культурăпа кану центрĕн фасадне юсама укçан пулăшма майсем шырамаллине асăнчĕ. Александр Петрович пур ертÿçĕне те вывескăсене пĕр пек тума ыйтрĕ. Вăл уява хатĕрленес тĕлĕшпе камăн мĕнле сĕнÿ пуррипе интересленсен, Хĕрлĕ Чутай гимназийĕн директорĕ Р.Н.Ильина юбилей тĕлне открыткăсем хатĕрлеме сĕнчĕ.  Райадминистрацин информатизаци пайĕн начальникĕ С.П.Князькова хаклă хăнасене валли асăнмалăх парнесем тусан аван пулнине пĕлтерчĕ.

А.П.Самылкин, ларăва пĕтĕмлетнĕ май, çитес лару рейд ирттернĕ хыççăн çеç пулнине, кирлĕ ĕçсене пурнăçлама васкаманнисенчен çирĕп ыйтнине пĕлтерчĕ.