Майăн 19-мĕшĕ хăш-пĕр çынсен асĕнче Пионерсен кунĕ пулнипе асра юлнă.  Хĕрлĕ галстуклă ачасем вырăнне хальхи пурнăçра çамрăк армеецсем, ачасен пĕрлешĕвĕсем... тухрĕç. Иртнĕ шăмат кун вĕсенчен чи активлисем, пуçаруллисем Шупашкара ачасен общество организацийĕсемпе пĕрлешĕвĕсен республикăри фестивальне пухăнчĕç. Районтан фестивале Атнар, Çĕн Атикасси шкулĕсенчи ачасен пĕрлешĕвĕсен лидерĕсем тата Хĕрлĕ Чутай гимназийĕнчи çамрăк армеецсем кайма тивĕçнĕ.

Фестивале ЧР Президенчĕ Н.Федоров та хутшăннине, Николай Васильевич республикăри чылай ача-пăча тата çамрăксен пултарулăх Çурчĕсене Хисеп грамотипе наградăланине те асăнмалла.

Фестивале савăнăçлă лару-тăрура уçнă хыççăн ачасем тĕрлĕ мастер-классене саланчĕç. Пирĕн районти вĕренекенсен пĕр ушкăнĕ вĕрентÿ институтĕнчи ученăйсен Канашĕн пÿлĕмĕнче социаллă проект çырма хăнăхрĕç. Тепĕр ушкăнĕ “Çамрăк лидерсен шкулĕ” проектăн ертÿçисем, Патшалăх Канашĕн депутачĕсем хутшăннипе хулари администрацин Пысăк залĕнче пулчĕç.

Çавăн пекех республикăри ачасен общество организацийĕсемпе пĕрлешĕвĕсен лидерĕсем конкурсра вăй виçрĕç. Атнар шкулĕнчи Т.Сергеева район чысне хÿтĕлесе зонăри тапхăра тухма пултарчĕ.