Ачаллă граждансене хушма социаллă пулăшу парас тĕллевпе тата Чăваш Республикин социаллă пурнăçпа экономика аталанăвĕнчи ырă туртăмсене шута илсе Чăваш Республикин Президенчĕ Н.В.Федоров 2007 çулхи çу уйăхĕн 1-мĕшĕнчен ачашăн уйăхсерен паракан пособие илмелли право кашни çын пуçне çирĕплетнĕ пурăнма кирлĕ чи пĕчĕк укçа виçинчен 150 процент таран пысăкрах тупăш тивекен çемьесене пулăшас тĕллевпе иртнĕ уйăхра Указ кăларчĕ. Паянхи кун пурăнма кирлĕ чи пĕчĕк укçа виçи 3069 тенкĕпе танлашать. Çавăн пекех Чăваш Республикин Правительстви ача укçи илес йĕркене улшăнусем кĕртрĕ. Малашне ача укçине ĕçлемен амăшĕсем те тивĕçĕç, енчен те ĕçлемен ашшĕ е амăшĕ шута илме тивĕçлĕ сăлтавпа ĕçе кĕмен е халăха ĕçпе тивĕçтерекен центрта учета тăман пулсан. Ача укçи илме ĕç вырăнĕ çукки, инвалид ачана пăхни, нумай ачаллă çемьере ачасене ÿстерни те çăмăллăх кÿрет. Ку енĕпе вара районти социаллă хÿтлĕх пайне ял тăрăхĕнчен ашшĕпе амăшĕн ĕç çукки çинчен çирĕплетекен хута илсе тăратмалла, ĕç кĕнекин копийĕ кирлĕ пулать, ăнлантарса çырма тивет. Çавăн пекех, каламалла, социаллă хÿтлĕх пайĕ япăх пурăнакан çемьесене те ача укçи илме пулăшĕ, ку енĕпе ятарлă комисси йĕркеленĕ. Çак комисси вĕсем мĕнле пурăннине тĕрĕслесе тăрĕ.

Хаклă вулаканăм, Сире пурне те социаллă хÿтлĕх пайĕнче кĕтетпĕр. Ача çулталăкĕ ячĕпе пурне те саламлатпăр.