Пĕлетпĕр ĕнтĕ, кăçал пирĕн районшăн питĕ паллă çул: район йĕркеленнĕренпе 80 çул çитет, Хĕрлĕ Чутай сали те 425 çул тултарать. Çак икĕ уява августăн 18-мĕшĕнче паллă тăватпăр. Шăпах çак юбилейсене тивĕçлĕн хатĕрленсе ирттерес тĕлĕшпе тата тавралăха тирпейлес те илем кĕртес тесе район пуçлăхĕ А.И. Криков тăтăшах районти предприятисемпе организацисен, учрежденисен ертÿçисемпе канашлу ирттерет.

Палăртмалла, кашни предприятипе учреждени е организаци умĕ яланах тасалăхпа тата тирпейлĕхпе палăрса тăмалла. Ку ĕçе юбилейсем çитеççĕ тесе кăна тумалла мар, çакă кулленех тĕп вырăнта пулмаллине асра тытмалла.

Тирпей-илем кĕртес ĕçе ытларахăшĕ пуçăннă-ха. Нумаях пулмасть иртнĕ канашлура район пуçлăхĕн çумĕ, обществăлла инфратытăм аталанăвĕн тата пурăнмалли çурт-йĕрпе коммуналлă хуçалăх ыйтăвĕсемпе ĕçлекен пайĕн начальникĕ И.Л.Хораськин пĕлтернĕ тăрăх, почта тата «Волгателеком»  УАО-н районти филиалĕ ку енĕпе васкамаççĕ-ха. Иван Лаврентьевич райпо ырă тĕслĕх кăтартнине çирĕплетнĕ. Акă, Кивĕ центрта вырнаçнă гастронома çывăх вăхăтра паллама та çук пулĕ. Çĕнĕ центрти Суту-илÿ çуртне те евроюсав тума палăртни куç кĕрет.

Тирпей-илем ыйтăвĕ малалла та çивĕч тăрĕ. Ертÿçĕсем яваплăха туйса предприятисен умĕсенче тата хăйсен территорийĕсенче йĕрке тăвасса шанас килет.