РФ Патшалăх Думин депутачĕ, “Единая Россия” партин членĕ П.Семенов пуçарнипе республикăра “Аслă çулсем умĕнче пуç таятпăр” акци иртет. Аслă Çĕнтерĕве халалланă акципе килĕшÿллĕн, республика районĕсенчи тата хулисенчи ĕçпе вăрçă ветеранĕсен ушкăнĕсем, Ветерансен Канашĕсен председателĕсемпе çумĕсем, Чăваш Енри пурĕ 35 çын, Юрий Никонович Григорьевский ертсе пынипе апрелĕн 19-мĕшĕнче  çĕршывăн тĕп хулинче Мускавра пулнă. Пирĕн районтан Ветерансен Канашĕн председателĕ В.Немешкин кайнă. Чи малтанах ветерансем Мускаври уйрăмах паллă вырăнсене çитсе курнă. Александр садĕнчи паллă мар салтакăн палăкĕ патĕнче вĕсене Павел Владимирович  Семенов кĕтсе илнĕ. Вăрçăра пуçне хунă салтаксене асăнса чĕрĕ чечексем хунă хыççăн Патшалăх Думи вырнаçнă çуртра 8-мĕш хутра пулнă. Кунта вĕсене социаллă политика тата ветерансен ĕçĕсемпе тимлекен комитетăн председателĕ Н.Д.Ковалев кĕтсе илнĕ. Николай Дмитриевич хăйĕн сăмахĕнче майăн 9-мĕшне, Аслă Çĕнтерÿ кунне, чăннипех йĕркеллĕ паллă тумаллине палăртнă. П.Семенов депутат та Н.Д.Ковалев сăмахĕсемпе килĕшсе ветерансене ытларах хÿтĕлемеллине, вĕсемшĕн тăрăшмаллине, вĕсене тимлĕх уйăрмаллине асăннă. Ветерансем тĕл пулура апрелĕн 6-мĕшĕнче Патшалăх Думи Çĕнтерĕвĕн Ялавĕ çинчи çурлапа мăлатука мĕншĕн кăларма йышăннине ыйтнă. Н.Ковалев палăртнă тăрăх, нимĕнле саккун та çурлапа мăлатук паллăсем пулнине хирĕçлемест. Ку паллăсене кăларма тăрăшни - чи пысăк мăшкăл, кÿренÿ.

Ветерансем юлашкинчен ту (Поклонная гора) патне çитсе курнă. Кунта вĕсем çар техникипе паллашнă.

П.Семенов депутатăн пуçарăвĕпе иртнĕ Мускаври çул çÿрев ветерансен асĕнче юлнă.