Апрелĕн 18-мĕшĕнче республикăра, çавăн пекех районта та черетлĕ Информаци кунĕ пулчĕ. Района ку хутĕнче ЧР Шалти ĕçсен министрĕн çумĕ В.Толстов ертсе пыракан ушкăн килсе çитрĕ. Ушкăнра çавăн пекех Чăваш Республикин куçман пурлăх кадастр агентствин федераллă управленийĕн ертÿçи В.Егоров, ЧР “Чăвашавтодор” ПУП генеральнăй директорĕн çумĕ С.Лекарев пулчĕç.

Пурĕ 10 ушкăн йĕркеленсе ял тăрăхĕсенчи халăхпа тĕл пулма тухса кайнă, ял хуçалăх предприятийĕсене çитнĕ, фермăсенче пулнă, ЧР Президенчĕн Патшалăх Канашне янă “ Вăхăта хакламалла, çынсемшĕн ĕçлемелле” Çырăвне сÿтсе явнă, çынсене Чăваш Республикин 2020 çулчченхи социаллă пурнăçпа экономика аталанăвĕн Стратегийĕпе паллаштарнă.

Райадминистраци пуçлăхĕ А.И.Криков ертсе пыракан ушкăн Атнарти ĕне комплексĕнчи лару-тăрупа паллашнă, ырă енĕсене палăртнă, вырăнти ял тăрăхĕн администрацийĕн ĕç-хĕлне тишкернĕ.  Ушкăн Атнар тăрăхĕнчи ырă ĕçсемпе кăмăллă юлнă. Унтан вĕсем Хĕрлĕ Чутай ял тăрăхĕн депутачĕсен Пухăвĕн ларăвне хутшăнчĕç, социаллă пурнăçпа экономикăна аталантарас тесен районăн мĕнле çул-йĕрпе каймалли ыйтăва сÿтсе яврĕç.

Район пуçлăхĕн çумĕ, ял хуçалăхпа экономика, пурлăх тата çĕр хутшăнăвĕсен управленийĕн начальникĕ А.П.Самылкин ертсе пыракан ушкăн Атнар ял тăрăхĕнче пулчĕ, Туканашри сысна комплексне çитсе курчĕ, унти çĕнĕлĕхпе паллашрĕ, ĕçченсемпе тĕл пулса калаçрĕ. “Коминтерн” ЯХПК ертÿçи А.Б.Новикова вырăнти лару-тăрупа паллаштарчĕ, малашлăх тĕллевĕсем çинче чарăнса тăчĕ. Ушкăн çĕнĕ технологипе йĕркеленĕ сысна витисене çитсе курчĕ. Сăмах май, паянхи куна Туканашри сысна комплексĕ тулли хăватпа ĕçлет, хальлĕхе 1600-е яхăн пуç витесенче тăрать. Малашлăхра вĕсен йышне татах та ÿстерме шутлаççĕ. Сысна пăхакансем талăкра 450-500 грамм чĕрĕ ÿт хуштараççĕ, унтан ытларах та пулнă. Альбина Борисовна выльăх-чĕрлĕх отрасльне ура çине тăратассишĕн хуçалăхра тăрăшса ĕçленине палăртнипе пĕрлех, юлашки вăхăтра сĕт, аш-какай хакĕ чакса пыни пирки пăшăрханса калаçрĕ.

Чăваш Республикин куçман пурлăх кадастр агентствин федераллă управленийĕн ертÿçи В.Г.Егоров комплексри лару-тăрупа тĕплĕн паллашнă хыççăн атнарсене ырă ĕçсемшĕн мухтарĕ, ăнăçу сунчĕ. Валерий Григорьевич ЧР Президенчĕ Н.В.Федоров палăртнă республикăн 2020 çулчченхи социаллă пурнăçпа экономика аталанăвĕн Стратегийĕпе кĕскен паллаштарчĕ, юлашки вăхăтсенче РФ çĕнĕ Çĕр кодексне йышăнни, çĕр йĕркелĕвĕ, патшалăх кадастрне тăвасси çинче чарăнса тăчĕ, çавăн пекех пурне те тавралăха тирпей-илем кĕртме чĕнчĕ, ака-суха ĕçĕнче ăнăçу сунчĕ.

Унтан ушкăн Атнар ял тăрăхĕн  вырăнти депутачĕсемпе тĕл пулчĕ, халăха хумхантаракан ыйтусене хускатрĕ. В.Г.Егоров кунти специалистсемпе депутатсене пĕрле тачă çыхăнса çĕр лаптăкĕсене кадастр учетне илессипе активлă ĕçлеме чĕнсе каларĕ. Ял тăрăхĕн пуçлăхĕ пĕлтернĕ тăрăх,  мĕн пур çĕр лаптăкĕн 98 процентне кадастр учетне тăратнă. Кунтах “Коминтерн” ЯХПК ертÿçи А.Б.Новикова иртнĕ Пĕрлехи информаци кунĕнче çĕр тавра панă ыйтусен хуравĕсемпе паллашрĕç.

Ушкăн Атнарти вăтам шкулта та пулчĕ. Ял тăрăхĕн пуçлăхĕ А.Н.Кузнецов çул çитмен çамрăксем хушшинче йĕркене пăсасси ÿсни пирки пăшăрханса калаçрĕ, А.П.Самылкин  çурт-йĕр çĕклес, хушма хуçалăха аталантарас, предпринимательлĕхе йĕркелесе ярас ĕçсенче приоритетлă наци проекчĕсемпе анлă усă курма сĕнчĕ. В.Г.Егоров çĕр ыйтăвĕ çинче чарăнса тăчĕ, РФ тата ЧР Президенчĕсем палăртнă программăсене пурнăçлас ĕçе хастар хутшăнма чĕнчĕ.