Апрелĕн 18-мĕшĕнче район центрĕнче çуркуннехи çăмăл атлетсен кросĕ иртрĕ. Унта районти шкулсен командисем, спорта юратакансем хутшăнчĕç.

Чи малтан 1994 çулсенчи тата унтан çамрăкрах хĕр ачасем старта тухрĕç, 500 метрлă дистанцире тупăшрĕç. Ку ушкăнра малти вырăна Л.Башкирова (Хĕрлĕ Чутай гимназийĕ) çĕнсе илчĕ, иккĕмĕшпе виççĕмĕш вырăнсене Мăн Этменти А.Ядуванкинапа А.Крыцовкина пайларĕç. Арçын ачасенчен пултарулăхпа В.Чумаков (Çĕн Атикасси) палăрчĕ, иккĕмĕш В.Ишмейкин (Штанаш) пулчĕ, виççĕмĕш - Э.Дадюков (Хĕрлĕ Чутай гимназийĕ).

1992-1993 çулсенчи хĕрсем 1 километрлă дистанцие парăнтарассипе ăмăрт­рĕç. Çĕнтерÿçĕ ята Атнарти А.Андреева тивĕçрĕ, иккĕмĕш - Е.Триковская (Хĕрлĕ Чутай гимназийĕ), виççĕмĕш - Т.Пандакова (Çĕн Атикасси). Арçын ачасен ушкăнĕнчен пĕрремĕшпе иккĕмĕш вырăнсене Çĕн Атикассинчи А.Ионовпа Г.Семенов пайларĕç, виççĕмĕш - А.Волков (Хĕрлĕ Чутай).

1989-1991 çулсенчи спортсменсенчен хĕрсен ушкăнĕнчен чи малтан финиша Л.Степанова (Хĕрлĕ Чутай гимназийĕ) çитрĕ, ун хыççăн М.Гусева (Атнар), виççĕмĕш - Р.Давыдова (Çĕн Атикасси). Аслăрах классенчи каччăсенчен, вĕсем 3 километр чупрĕç, чи пултаруллисем Мăн Этменти М.Сидоровпа М.Семенов пулчĕç, виççĕмĕш - М.Инжебейкин (Мишеркасси).

Çăмăл атлетсен кросне аслăрах çулсенчи спорта кăмăллакансем те хутшăнчĕç. Хĕрарăмсенчен хастарлăрах Л.Михуткина (спорт шкулĕн тренерĕ), Р.Вазякова (Мишеркасси), Г.Мидейкина (Хĕрлĕ Чутай гимназийĕ), Г.Бровкина (Шулю), Л.Шивиркина (редакци) пулчĕç, арçынсенчен - Ю.Гурьянов (Шулю), В. Харитонов (Хусанушкăнь), Ю.Сидоров (Çĕн Ирчемес), И.Сатлайкин (Штанаш), В.Герасимов (Питĕркасси). Командăсемпе илсен, тĕп шкулсенчен чи нумай очко пухса пĕрремĕш вырăна шулюсем, иккĕмĕшне тралькассисем тухрĕç, виççĕмĕш -  серенкассисем. Вăтам шкулсем хушшинчи тупăшура çĕнтерÿçĕ ята хĕрлĕчутайсем тивĕç­рĕç, иккĕмĕшпе виççĕмĕш вырăнсене мăнэтменсемпе çĕнатикассисем пайларĕç.

Паян районти чи вăйлă атлетсем республикăра мала тухассишĕн иртекен çуркуннехи кроса хутшăнаççĕ.