Иртнĕ шăмат кун районти спорт шкулĕнче, 18 çула çитмен çамрăксем хушшинче, кире пуканĕ йăтассипе республикăра мала тухассишĕн турнир иртрĕ, унтах аслисем Чăваш Республикин Кубокне çĕнсе илессишĕн тупăшрĕç.

Уява спортăн çак енĕпе кĕрешекенсен Республика Федерацийĕн Президенчĕ Ю.М.Карпов, Чăваш Енре тата Раççейĕпе паллă спорт мастерĕсем хутшăнчĕç. Ăмăртăвăн тĕп судйи 1983 çулта кире пуканĕ йăтса спорт мастерĕ ята тивĕçнĕ, 2000 çулта тĕнче чемпионатĕнче ветерансем хушшинче 2-мĕш вырăна тухма пултарнă пирĕн ентеш В.П.Ульянов пулнине палăртмалла.

Спорта кăмăллакансен уявĕ савăнăçлă лару-тăрура иртрĕ. Хăнасене, ырă йăла-йĕркепе, çăкăр-тăварпа кĕтсе илчĕç, райадминистраци пуçлăхĕ А.И.Криков çамрăксене кĕрешÿре ÿсĕмсем сунчĕ.

Палăртмалла, республика шайĕнчи тупăшăва 9 районтан килсе çитнĕ, Чăваш патшалăх университечĕпе ял хуçалăх академийĕ те хăйсен командисене тăратнă. Район чысне 13 пăхаттир хÿтĕлерĕ.

Чи малтан помост çине чи çăмăл виçеллисем тухрĕç. Ку ушкăнра (55 килограмлисем) Хĕрлĕ Чутай гимназийĕнчи Е.Бронюков 3-мĕш вырăна тивĕçрĕ, хĕрсенчен Э.Габдулхаева (Питĕркасси) иккĕмĕш пулчĕ.

Йывăртарах виçеллĕ атлетсем хушшинчи кĕрешÿ çивĕч иртрĕ. 60 килограмм таякан спортсменсенчен В.Чертов (Çĕн Атикасси) 4-мĕш вырăна тухрĕ. 65 килограмлисенчен Н.Башкиров (Атнар) - виççĕмĕш, 70 килограмлă виçеллисенчен Хĕрлĕ Чутай гимназийĕнче ăс пухакан А.Балалайкин чемпион ятне çĕнсе илме пултарчĕ, иккĕмĕш - Е.Кандейкин (Хĕрлĕ Чутай гимназийĕ). 75-80 килограмм йывăрăшлă атлетсем хушшинче Çĕн Атикасси шкулĕнчи вĕренекенсем Георгипе Геннадий Кузнецовсем 4-мĕшпе 5-мĕш вырăнсене пайларĕç. Унтан та йывăртарах виçеллисенчен Анат Çĕрпÿкасси ялĕн каччи С.Терентьев чи малти вырăна çĕнсе илчĕ, виççĕмĕш - Атнар шкулĕн çамрăкĕ А.Савельев.

Аслăрах çулхисем те помост çине тухса вăй виçрĕç. 65 килограмлисен ушкăнĕнче С.Ильин (Хĕрлĕ Чутай) иккĕмĕш пулчĕ, В.Кузнецов (Çĕн Атикасси) - тăваттăмĕш. 75 килограмлă тата йывăртарах виçеллисенчен Н.Борисовпа (Енкĕлт) М.Прокопьев (Тури Çĕрпÿкасси) ик­кĕмĕш вырăна тивĕçлĕ пулчĕç.

Команда зачетĕнче чи нумай очко пухса пĕр­ремĕш вырăна Шупашкарти ял хуçалăх академийĕнчи спортсменсем çĕнсе илчĕç, иккĕмĕш - патăрьелсем, виççĕмĕш - йĕпреçсем, тăваттăмĕш - хĕрлĕчутайсем.

Çĕнтерÿçĕсене ЧР Физкультурăпа спорт тата туризм министерствин Хисеп грамотисемпе призĕсене парса чысларĕç.

Спорт уявне ирттерме С.Немешкин, Г.Ульянова, В.Ульянов, Г.Ульянов, Г. Иванов,  Н.Борисов, В. Ярайкин, А.Туйманов, Ю.Шереметьев, Ю.Бронюков, Н.Никифоров спонсорла пулăшу панă.