Апрелĕн 12-мĕшĕнче районта черетлĕ Профилактика кунĕ иртрĕ.

Райадминистрацин ĕçченĕсем ушкăнсене пайланса ял тăрăхĕсене çитсе курчĕç. Социаллă аталану пайĕн начальникĕ А.Самсонов ертсе пыракан ушкăн Хĕрлĕ Чутай ял тăрăхĕнче пулчĕ. Профилактика кунĕнче кунти ял тăрăхĕн пуçлăхĕн çумĕ С.Кчетков ШĔП-ĕн дознавателĕ В.Николаев преступлени тума май паракан сăлтавсене пĕтерес тесе йышăнмалли мерăсем çинчен представлени тăратнине пĕлтерчĕ. Ку представлени Тумликасси ялĕнчи И.Тимофеев ÿсĕрле хăйĕн амăшне хĕненипе çыхăннă. Çавăн пекех Сергей Николаевич Хĕрлĕ Чутай ял тăрăхĕнчи криминаллă лару-тăрупа паллаштарчĕ. Кăçалхи 3 уйăхра ку тăрăхра 12 преступлени пулнине регистрациленĕ. Пурĕ ял тăрăхĕсен ĕçченĕсем 38 çынна контрольлесе сăнасах тăраççĕ. Çак 38 çынран виççĕшне çула çитменнисен учетне илнĕ, 6-шĕ - психика чирĕпе чирлисем, 2-шĕ - врач сĕнĕвĕсĕрех психотроплă япаласемпе усă курма пултаракансем, 5-шĕ - уголовнăй яваплăхран хăтарнисем, 9-шĕ - срок çитмесĕрех иртерех ирĕке тухнисем, 13-шĕ - уголовнăй майпа айăпланнисем.

С.Кчетков палăртнă тăрăх, преступлени тума пултаракан çынсене куçран вĕçертмеççĕ, вĕсемпе профилактика калаçăвĕсем ирттерсех тăраççĕ.