Физкультурăпа тата спортпа туслă пулни сывлăхшăн усăллă. Юлашки вăхăтра сывă пурнăç йĕркине халăх хушшинче анлă сарассипе спорт мероприятийĕсем час-часах ирттереççĕ. Акă, апрелĕн 9-мĕшĕнче педагогсем хушшинче волейболла выляссипе тупăшу иртрĕ. Ăмăртăва 5 команда (ушкăнра 4 арçын, 2 хĕрарăм) хутшăнчĕ. Учительсем хăйсен шкул чысне çирĕп хÿтĕлерĕç. Хĕрÿ кĕрешÿре финала штанашсемпе спорт шкулĕн команди тухма пултарчĕç. Чи вăйлисен тупăшăвне сăнама питех те кăмăллă пулчĕ, икĕ командăн та вăйĕсем пĕр пек-çке. Çапах та юлашкинчен штанашсем волейбол ăсталăхне кăтартса çĕнтерÿçĕсем пулса тăчĕç. Кунта уйрăмах команда капитанĕн И.И.Сатлайкинăн пултарулăхĕ пирки асăнас килет. Вăл - чăн-чăн спорт ăсти. Иккĕмĕш вырăна спорт шкулĕн команди çĕнсе илчĕ, виççĕмĕшсем - мăнэтменсем.

Апрелĕн 14-мĕшĕнче районти спорт шкулĕнче Чăваш Республикин Кубокне çĕнсе илессишĕн кире пуканĕ йăтассипе пысăк ăмăрту пулать. Республикăри чи вăйлă атлетсен тупăшăвĕ интереслĕ пулĕ.