Иртнĕ ытлари кун, апрелĕн 3-мĕшĕнче, район администрацийĕн пуçлăхĕн çумĕнчи коллеги ларăвĕ иртрĕ. Ларăва район пуçлăхĕ А.И.Криков йĕркелесе ертсе пычĕ. Коллеги членĕсем кун йĕркипе килĕшÿллĕн 4 ыйту пăхса тухрĕç.

Чи малтанах районти халăха социаллă хÿтлĕх  паракан пайĕн начальникĕ В.И.Ярабаева районта ĕçлев условийĕсене лайăхлатмалли тата ĕç саккунĕсене  пăхăнса ĕçлемелли çинчен калакан программа епле пурнăçланса пыни пирки каласа пачĕ. Вера Ивановна каланă тăрăх, иртнĕ çул производствăра ĕç сыхлавне пăхăнманнипе 4 инкек пулнă, вĕсенчен пĕри йывăррисен шутĕнче. 2005 çулта та кун пек инкек тăваттă пулнă, иккĕшĕ йывăррисен шутĕнче, 2004 çулта - 6, 2003 çулта - 11. Кашни çулах ĕç сыхлавĕн саккунĕсене пăхăнса ĕçлессипе уйăхлăх ирттереççĕ. Кăçал вăл апрелĕн 1-мĕшĕнчен пуçласа апрелĕн 28-мĕшĕччен тăсăлĕ. Пĕлтĕрхи пĕтĕмлетÿсем тăрăх, Ĕçлев Кодексне казначейство уйрăмĕнче çирĕп пăхăнса ĕçлени палăрнă, тĕп больницăпа райгаза та ырламалла. Анчах та, коллеги членне, райпо Канашĕн председательне А.Ю.Степанова медицина тĕрĕслевĕн хакĕ (пĕлтĕр 120 пулнă, кăçал - 180) ÿсни пăшăрхантарать. Ку пулăм мĕнле сăлтавпа çыхăннине коллеги членĕсем В.И.Ярабаевана çитес ларура пĕлтерме сĕнчĕç.

Иккĕмĕш ыйту çул-йĕре пăхса тăрасси пулчĕ. Ку ыйтупа райадминистрацин обществăлла инфратытăм аталанăвĕн пай начальникĕн çумĕ, çул-йĕр секторĕн заведующийĕ В.Н.Романов калаçрĕ. Атнар ял тăрăхĕн пуçлăхĕ А.Н.Кузнецов, Хусанушкăнь ял тăрăхĕн пуçлăхĕ А.Г.Праулов çулсем япăхланса кайни пирки калаçрĕç, хĕллехи вăхăтра çулсене юртан йĕркеллĕ тасатса тăманшăн укçине те ĕçленине кура тÿлеме сĕнчĕç.

Малалла вара пухăннисем районти ял хуçалăх кооперативĕсемпе колхозсем çур акине епле хатĕрленнипе паллашрĕç. Район пуçлăхĕ, пĕлтĕр çул  çĕр улмине 95 гектар çĕр лаптăкĕ çинче туса илнĕ пулсан, кăçал унăн çĕр лаптăкĕ 100 гектартан кая пулмалла маррине палăртрĕ. Александр Иванович ку ĕçе пурнăçа кĕртме райадминистрацин ял хуçалăх, экономика, пурлăх тата çĕр хутшăнăвĕсен управленине тата Питĕркасси ял тăрăхĕн пуçлăхне А.Т.Дмитриева хушрĕ.

Ларăвăн юлашки ыйтăвĕ халăхран газ кĕртме пухнă укçана каялла тавăрса парасси çинчен пулчĕ. Уйрăмах ку ыйту тавра район Пухăвĕн депутачĕ Н.С.Артемьев, район прокурорĕн пулăшаканĕ А.А.Ермолаев чылай калаçрĕç, ял тăрăхĕсен пуçлăхĕсем парăма татасси пирки мĕнле ĕçсем туни пирки пĕлтерчĕç. Калас пулать, чылай укçа-тенке халăха тавăрса панă пулин те, парăм - пĕр миллиона яхăн. Ку укçа-тенкĕн хуçисен шутĕнче туктамăшсем, тумликассисем, ишеккассисем, питĕркассисем тата ыттисем те. Палăртас пулать, ял тăрăхĕсен пуçлăхĕсем тăрăшсан хăшĕ-пĕри хăйсен укçине каялла илĕ те, анчах вĕсенчен ытларахăшĕ чылай вăхăт иртнипе ку укçа-тенке тивĕçеймест.