Пултаруллă та талантлă учительсене тупса палăртас, вĕсене хавхалантарас, педагогсен опытне сарас тĕлĕшпе кашни çулах «Çулталăк учителĕ - 2007» конкурс ирттереççĕ. Çавна май, конкурса хатĕрлесе ирттерме, ятарлă комисси йĕркеленĕ (председателĕ Т.Н.Шереметьева), вăл конкурсантсен ĕçĕсене тишкерсе пынă.

Конкурс виçĕ тапхăрпа иртнĕ. Малтанах педагогсем «Класс мастерĕ» конкурса хутшăнса хăйсен пултарулăхне кăтарт­нă, ик­кĕмĕшĕнче - уçă уроксем, мартăн 28-мĕшĕнче районти культурăпа кану центрĕнче супер финалти ăмăрту пулчĕ. Сăмах май, пуçламăш тапхăрти конкурссене тĕплĕн тишкернĕ хыççăн районти чи пултаруллă, ялан çĕннине шыракан, творчествăлла ĕçлекен педагогсем финалти турнира хутшăнма ирĕк çĕнсе илнĕ. Вĕсем çаксем: М.А.Лихутина (Хусанушкăнь шкулĕ), Н.В.Хохлова (Хĕрлĕ Чутай гимназийĕ), М.Ю.Вазина (Питĕркасси), Л.П.Сидорова (Штанаш), В.А.Евсеев (Çĕн Атикасси), С.В.Егоров (Хĕрлĕ Чутай гимназийĕ), В.П.Немешкина (Мăн Этмен), А.В.Макарова (Тралькасси). Конкурсăн супер финалне Хĕрлĕ Чутай гимназийĕнчи педагогсем И.Е.Захаровапа Л.А.Кашкирова йĕркелесе ертсе пычĕç. Район пуçлăхĕ А.И.Криков, вĕрентÿ пайĕн начальникĕ Т.Н.Шереметьева педагогсен ĕçне пысăка хурса хакласа пурне те уяв ячĕпе саламларĕç, конкурсантсене ăнăçу сунчĕç.

«Çулталăк учителĕ - 2007» конкурса хутшăнакансен кашнин хăйсен ĕçне туллин уçса паракан, хавхалантарса пыракан ушкăн килсе çитнĕ. Кашни конкурс хыççăн тăхтавра илемлĕ юрă шăранчĕ.  Учительсем хăйсен  пултарулăхĕпе тавçăрулăхне сцена çинче тарăннăн уçса пама тăрăшрĕç, ачасене  чунтан юратнине, вĕсене тивĕçлĕ пĕлÿ тата тĕрĕс воспитани парса ÿстерессишĕн ырми-канми тăрăшнине каларĕç. Жюри членĕсем вĕсен талантне, пултарулăхне пур енлĕн тĕрĕс хак пачĕç, пĕтĕм­летÿ турĕç. Çапла вара конкурсăн кашни тапхăрĕнчи ĕçсене пĕтĕмлетнĕ хыççăн «Çулталăк учителĕ - 2007» конкурс çĕнтерÿçи ята Питĕркассинчи математикăпа информатика предмечĕсене вĕрентекен М.Ю.Вазина çĕнсе илчĕ, пĕрремĕш степеньлĕ Диплома тата премие тивĕçрĕ. Иккĕмĕш степеньлĕ дипломсене В.П.Немешкинапа Н.В.Хохлова  çĕнсе илчĕç, виççĕмĕш степеньлĕ дипломсене - Л.П.Сидоровапа С.В.Егоров. Çавăн пекех В.А.Евсеева «Учитель-практикант», А.В.Макарована «Учитель-исследователь», М.А. Лихутинана «Учитель-вдохновитель» номинацисем тăрăх хавхалантарчĕç.

Район администрацийĕ конкурса ирттерме пулăшнăшăн райпо ертÿçине Ю.А.Степанова, “Янтарь” обществăн начальникне Г.И.Ярлова, çăкăр завочĕн директорне В.С.Кузьмина, социаллă хÿтлĕх пайĕн ертÿçине В.И.Ярабаевана, тĕп библиотекăн директорне М.Н.Мареевана, ял тăрăхĕсен пуçлăхĕсене В.К.Романовпа Н.Н.Русскова, Я.М. Хорайкин предпринимателе, “Çын тата çут çанталăк” музей директорне З.С.Спиридонована тав тăвать.