Иртнĕ шăмат кун, мартăн 24-мĕшĕнче, республикăн тĕп хулинче Я.Ухсай ячĕпе хисепленекен Культура çуртĕнче хĕрлĕчутайсен ентешлĕх уявĕ пулчĕ. Уява 1000-е яхăн Шупашкарти ентешсемпе пĕрле пирĕн районта пурăнакансенчен те чылайăшĕ хутшăнчĕç.

Малтанах куракансем умне “Чавал” ентешлĕх председателĕ П.В.Ивантаев тата район  администрацийĕн пуçлăхĕ А.Криков тухрĕç. Унтан залри кашни çын ура çине тăрса Хĕрлĕ Чутай районĕн Гимне итлерĕ. П.В.Ивантаев кун пек уява 15-мĕш çул уявланине палăртрĕ. Юлашки çулсенче ентешлĕх уявне ирттерес тесе Хĕрлĕ Чутай районĕнче çуралса ÿснĕ А.Иваницкий, В.Кантейкин, В.Романов, Н.Михопаркин нумай ĕç тунине палăртрĕ,  Г.Яковлева, А.Самсонова, В.Оринова, Н.Михопаркина, Н.Максюткина, В.Кантейкина тав сăмахĕ каласа чечек çыххине парнелерĕ. А.И. Криков Чутай тăрăхĕнче çуралса ÿснĕ, Шупашкарта пурăнакан çынсем района аталантарассишĕн сахал мар ĕçсем туни пирки тĕплĕн паллаштарчĕ, Г. Яковлева, П.Ивантаева,  З.Яковлевана, Р.Петрована, И.Кочеткова, М.Белякова, В.Осмелкина, З.Яковлевана, С.Чумакова Тав çырăвĕ парса чысларĕ.

Малалла уява килнĕ республикăри ытти районсен ентешлĕхĕсен ертÿçисем сăмах илсе хĕрлĕчутайсене ăшшăн саламларĕç, ÿсĕмсем сунчĕç.

Чăваш наци конгресĕн председателĕ Г.Н.Архипов чăвашлăха аталантарассишĕн ĕçсем тунишĕн алă пуснă Тав çырăвне Ю.А.Николаев, А.П.Самылкин, В.Г.Орлов, П.В.Ивантаев, В.М.Савинкин тивĕçрĕç.

Официаллă пай пĕтсен концерт пулчĕ. Калас пулать, концерт икĕ пая пайланчĕ: классика тата эстрада. Кунта вара Чутай ывăл-хĕрĕсен пултарулăхне курма тÿр килчĕ. Уйрăмах залра ларакансене Александр Самсонов, Зоя Спиридонова, Юлия Юнисова, Иван Шинжаевпа Ирина Шинжаева, Ольга Егорова шăрантарнă юрăсем кăмăла кайрĕç.