Февралĕн 22-мĕшĕнче райадминистрацин ларусем ирттермелли Пысăк залĕнче ветерансен Канашĕн черетлĕ пленумĕ иртрĕ. Унта район пуçлăхĕ А.И.Криков та хутшăнчĕ.

Пленума ветерансен Канашĕн председателĕ В.И.Немешкин уçрĕ, кун йĕркипе паллаштарчĕ, район пуçлăхне А.И. Крикова сăмах пачĕ. Александр Иванович район аталанăвĕн иртнĕ çулхи кăтартăвĕсемпе кĕскен паллаштарчĕ, ветерансене район пурнăçĕнче пысăк тÿпе хывнăшăн чĕререн тав турĕ, пурне те Тăван çĕршыв хÿтĕлевçин кунĕпе саламларĕ.

В.И.Немешкин районта ветерансен Канашĕ йĕркеленнĕренпе 20 çул çитнине пĕлтерчĕ, унăн историйĕ çинче чарăнса тăчĕ, ветерансен  пурнăçĕнче пысăк тÿпе хывнăшăн предприяти-организацисен ертÿçисене, ял тăрăхĕсен пуçлăхĕсене тата ыттисене те тав турĕ.

Социаллă хÿтлĕх пайĕн ертÿçи В.И.Ярабаева саламлă сăмахпа тухса калаçрĕ, парне турĕ.

Пленума пухăннă ветерансем чылай çивĕч ыйту хускатрĕç, вĕсем пурте, паллах, чун ыратăвĕпе çыхăннă. Ватăсем сывлăхĕсем хавшакран час-часах больницăна, эмел туянма аптекăна çÿреççĕ. Унти хăш-пĕр ĕçченсем ветерансене хисеплемесĕр калаçни тĕл пулкалать, уççăнах кÿрентерни те пулнă. Пурнăçри тата чылай тĕрĕс марлăх пирки сăмах хускатрĕç ватăсем. Кун йĕркинчи ыйтусене пăхса тухнă хыççăн ветерансене тивĕçлĕ пулăшу парасси пирки йышăну турĕç, ветерансен Канашĕн активисчĕсене Хисеп грамотисемпе тата парнепе чысларĕç, районти культурăпа кану центрĕ çумĕнче йĕркеленнĕ ветерансен хорĕ пухăннисене хăйсен пултарулăхĕпе савăнтарчĕ.