Иртнĕ эрнере районти спорт шкулĕнче Сывлăхпа спорт кунĕ иртрĕ. Ăна Афган тата Чечен вăрçисенче пуçĕсене хунă воин-интернационалистсене асăнса, çамрăксене оборонăпа массăллă спорт уйăхлăхне хутшăнтарас, сывă пурнăç йĕркине хăнăхтарас тата сывлăха çирĕплетес тĕллевсемпе йĕркелерĕç. Уява воин-интернационалистсен тăванĕсем те килсе çитрĕç.

Сывлăх уявĕн пĕр­ремĕш пайĕнче спортсменсене вăйăсенче ăнăçу, телей, ÿсĕмсем чылай сунчĕç, сывă пурнăç йĕркине тытса пыма сĕнчĕç. Ун хыççăн спорт ăстисем программăна малалла тăсрĕç.

Сывлăх кунĕ спорт çемйисен тупăшăвĕнчен пуçланчĕ. Старта Сатлайкинсен (Штанаш), Карповсен (Мăн Этмен), Романовсен (Хĕрлĕ Чутай), Герасимовсен (Питĕркасси), Мурайкинсен (Тралькасси) çемйисем тухрĕç. Вĕсем тĕрлĕ тупăшусене хутшăнса вăй виçрĕç. Малти вырăнсене çĕнсе илессишĕн хытах кĕрешрĕç çемьесем. Пĕтĕмлетÿсем çапларах: пĕрремĕш вырăна Штанашри Иванпа Елена Сатлайкинсем тата Евгений ывăлĕ çĕнсе илчĕç, иккĕмĕш - Карповсем, виççĕмĕш - Людмилăпа Владимир тата Екатерина Герасимовсем (Питĕркасси).

Дартс енĕпе спорт ăсталăхне кăтартса çĕнтерÿçĕсем Ольга Прокопьевапа (Хĕрлĕ Чутай гимназийĕ) Николай Быков (Питĕркасси) пулчĕç.

Алă вăйне виçес тупăшура чи вăйлисем Людмила Герасимовапа Анатолий Дмитриев (Питĕркасси тăрăхĕ) тесе çирĕплетрĕç.

Пăхаттир ята çĕнсе илессишĕн хĕрÿ кĕрешÿ пычĕ. Кире пуканне йăтса пăхас текенсем чылаййăн пулчĕç. Штанашри Зоя Прокопьева 16 килограмлă кире пуканне 50 хутчен йăтма пултарчĕ, арçынсенчен пултаруллăрах “Нива” ЯХПК ертÿçи Владимир Мурайкин пулчĕ. Вăл 24 килограмм йывăрăш кире пуканне 81 хутчен çĕклерĕ.

Пневматикăлла винтовкăран пеме кăмăллакансем хушшинче малти вырăна Атнар шкулĕнчи Юрий Павлов çĕнсе илчĕ, хĕрарăмсенчен - Света Бродюкова (Питĕркасси).

Шахматла выляссипе яланхи пекех çĕнтерÿçĕ ята Евгений Сергеев (Хĕрлĕ Чутай) тивĕçрĕ, хĕрсенчен пултаруллăрах Наталья Рябикова (Шулю) пулчĕ.

Шашистсен турĕнче чи маттурри Юрий Пахинов (Хĕрлĕ Чутай), хĕрсенчен - Карина Ефимова (Кушлавăш).

Николай Уливанкин сĕтел çинче теннисла выляса  пурне те çĕнтерчĕ, хĕрсен ушкăнĕнче Çĕн Ирчемесри Алиса Карпова палăрчĕ.

Волейбол вăййине кăмăллакансем хушшинче тупăшу çивĕч иртрĕ. Çичĕ командăран пĕрремĕш вырăна “Фемида” (прокуратурăпа суд ĕçченĕсем) команда çĕнсе илчĕ, иккĕмĕш - Хĕрлĕ Чутай ял тăрăхĕн спортсменĕсем, виççĕмĕш - Тралькассинчи çамрăксем.

Команда зачетĕнче чи нумай очко пухса пĕр­ремĕш вырăна Хĕрлĕ Чутай ял тăрăхĕ тивĕçрĕ, иккĕмĕш - Мăн Этмен, виççĕмĕш - Тралькассипе Питĕркасси.

Çĕнтерÿçĕсене Хисеп грамотисемпе тата укçан преми парса чысларĕç.