Февралĕн 10-мĕшĕнче Нефтеюганск хулинче “Олимп” спорткомплексĕнче ирĕклĕ майпа кĕрешессипе Пĕтĕм тĕнчери турнир иртнĕ. Турнира 7 çĕршывран 200 ытла спортсмен килсе çитнĕ, вĕсен шутĕнче Чăваш Енри 8 пăхаттир: А.Сергеев, В.Трофимов, А.Филиппов (Канаш районĕ), А.Офишкин (Хĕрлĕ Чутай), А.Лапшин (Елчĕк), А.Цветков (Патăрьел), Д.Григорьев, Н.Григорьев (Шупашкар).

Чăваш Ен делегацине Раççей Патшалăх Думин депутачĕ, Чăваш Ен ирĕклĕ майпа кĕрешекенсен федерацин председателĕ П.Семенов ертсе пынă.

Ханты-Мансийск автономлă округ Думин депутачĕн, Чăваш Енре Елчĕк районĕнче çуралса ÿснĕ, Владимир Семеновăн призне çĕнсе илессишĕн тĕнчипе пуçтарăннă спортсменсем çивĕч кĕрешнĕ. Елчĕк каччи А.Лапшин хăй виçеллисем хушшинче виççĕмĕш вырăна тивĕçнĕ, ыттисен кăтартăвĕсем те савăнтараççĕ. Çапла вара, Чăваш Ен ушкăнĕ  команда зачетĕнче виççĕмĕш вырăна - бронза медале тивĕçнĕ. РФ Патшалăх Думин депутачĕ, “Пĕрлĕхлĕ Раççей” фракцин членĕ П.Семенов чăваш спортсменĕсене тивĕçлĕ çĕнтерÿпе ăшшăн саламланă, пăхаттирсене тĕнче шайĕнчи ăмăртусене малашне те хутшăнма ăнăçу суннă.