Йĕлтĕрçĕсен “Раççей йĕлтĕр йĕрĕ - 2007” чупу Чăваш Енре февралĕн 11-мĕшĕнче “Шупашкар: 500 çул” культурăпа кану паркĕнче иртрĕ. Йĕлтĕре кăмăллакансем тата спортри профессионалсем массăллă чупăва тухрĕç. Пысăк уява районти йĕлтĕрçĕсем те активлă хутшăнчĕç.

Спорт уявне ЧР Президенчĕ Н.Федоров уçрĕ, спорта  юратакансене çирĕп сывлăх, телей, килĕшÿÿ, ĕçре тăрăшулăх сунчĕ. Ун хыççăн тĕрлĕ министерствăсемпе ведомствăсен ертÿçисем, влаç тытăмĕнче ĕçлекенсем, предприяти-организаци ертÿçисем, вĕренÿ заведенийĕсен спортсменĕсем, шкул ачисем, йĕлтĕре кăмăллакансем старта тухрĕç.

Чупу хыççăн чупу иртрĕ. Йĕлтĕрçĕсем 3, 5, 10 километрлă дистанцисене тухрĕç. Хула-районсенчен пултаруллă спорт çемйисем те йĕлтĕр йĕрĕ çине тăчĕç. Çак йышра Хĕрлĕ Чутай салинчи Дадюковсен çемйи пулчĕ, “Раççей йĕлтĕр йĕрĕ - 2007” чупăвăн призне тивĕçрĕ. Палăртма кăмăллă, çак мероприятие пирĕн районтан 150-ăн хутшăнчĕç.