«Хĕрлĕ Чутайри электричество сечĕсем» предприятире виçĕм кун Уçă алăксен кунĕ иртрĕ. Унта Хĕрлĕ Чутай гимназийĕнчи 10-мĕш класра вĕренекен ачасем пухăнчĕç. Çамрăксене энергетика историйĕпе, унăн паянхи лару-тăрăвĕпе, аталанăвĕпе Улатăрти электричество сечĕсен кадрсен пайĕн специалисчĕ Л.Мангелова, «Хĕрлĕ Чутайри электричество сечĕсем» предприятин начальникĕ М.Мельников, кунти диспетчер Н.Паркин паллаштарчĕç.

- Энергетикăра ăста, пысăк квалификациллĕ специалистсем кирлĕ, - терĕ тĕл пулура Л.Мангелова. - Уçă алăксен кунĕсене йĕркелесе эпир ачасене интереслĕ те кăткăс, малашлăхлă ĕçе вырнаçма май пуррине кăтартасшăн.

Л.Мангелова çавăн пекех вĕренекенсене энергетиксен профессине алла илес тесен мĕнле вĕренÿ заведенийĕсене çул тытмаллине, тĕллевлĕ направленипе те усă курма май пуррине пĕлтерчĕ.

Тĕл пулура ачасем предприяти ĕçĕ-хĕлĕпе паллашрĕç. Уйрăмах диспетчер службинчи районăн пĕтĕм электросистемине сăнласа паракан щит пирки М.Мельников каласа пани асра юлчĕ. Сăмахран, пĕр-пĕр ялта электропралук татăлса кайсан энергетиксем тÿрех çак лини пирки, вăл ăçтарах вырнаçнине пĕлеççĕ. Мĕнле; Диспетчер службинчи компьютер кун пирки ятарлă сигнал парать.

Подстанцинче те курмалли, пĕлмелли нумай. Н.Паркин диспетчер трансформаторсем, пысăк вольтлă линисем çинчен каласа пачĕ. Предприятин вĕренÿ полигонĕнче те ачасем пулса курчĕç. Сăмах май, кун пек полигон Чăваш Енĕпе те пирĕн районта çеç. Энергетиксемпе кунта çулсеренех вĕренÿ ирттереççĕ. Палăртмалла, энергетика отраслĕнче ĕçлекенсен пурин те кашни çулах квалификаци шайне ÿстермелле. Вĕренÿ курсĕсене Шупашкар хулинче ирттернĕ. Малашне вара пĕлÿ ăсталăхне ÿстерме пулăшакан вĕренÿсене вырăнтах ирттерме палăртаççĕ.

Уçă алăксен кунĕнче вĕренекенсем энергетикăра профессие лайăх пĕлекен специалистсем çеç кирлине ăша хыврĕç.