Иртнĕ эрне кун, декабрĕн 15-мĕшĕнче, районти ачасемпе çамрăксен спорт шкулĕ хăйĕн 25 çулхи юбилейне паллă турĕ.

Юбилее халалласа ирттернĕ уява район администрацийĕн пуçлăхĕ А.И. Криков,  спорт шкулĕнче тĕрлĕ çулсенче ĕçленисем, пĕр­ремĕш директор А.Н. Ярайкин, Б.П.Вазиков, В.П.Ефимов (райспорт комитечĕн председателĕнче 15 çул хушши тимленĕ), унтан вĕренсе тухнă паллă спортсменсем Е.Н.Грузинова (çемйипех), Н.С.Гусельщикова, Натальяпа Раиса Шивиревасем, хăнасем чылаййăн килсе çитнĕ.

Уявăн торжествăлла пайĕ культурăпа кану центрĕн сцени çинче иртнĕ. Ăна спорт шкулĕн директорĕ А.М.Никитин ертсе пынă. Савăнăçлă мероприятие килнисем пĕрин хыççăн тепри сăмах илнĕ, спорт шкулĕн алăкĕсем пуриншĕн те яланах уçă пулччăр тенĕ, районти яш-кĕрĕмпе хĕр-упраçа унта çÿресе, сывлăхĕсене çирĕплетсе, спортри ăсталăхне ÿстерсе ăмăртусенче Чутай ен чысне ăнăçлă хÿтĕлеме сĕннĕ, юбилейпе парнесем тунă.

Паянхи вăхăтра спорт шкулĕнче 14 тренер ĕçлет. Вĕсем тăрăшнипе чылай шкулсенче спорт шкулĕн филиалĕсем ĕçлеççĕ. Уявра вĕсен ĕçне тивĕçлĕ хак панă, малашне те çитĕнекен ăрăва физкультурăпа спорта явăçтарас ĕçре ăнăçу суннă.

Унтах, çулталăка пĕ­тĕм­­летсе, чи-чи пултаруллисене номинаципе палăртса район пуçлăхĕ А.И. Криков Тав çырăвĕ тата Кубок парса чысланă. Акă “Чи лайăх шахматист” ята Е.Сергеевпа (Хĕрлĕ Чутай) О.Баранова (Чурпай) тивĕçнĕ, “Чи лайăх теннисист” - Н.Юманкинпа (Хĕрлĕ Чутай) М.Сидорова (Çĕн Ирчемес), “Чи лайăх шашист” - Л.Еремеев (Тралькасси), “Чи лайăх футболист” - С. Ульянов (ШĔП), “Чи лайăх футбол команди” - “Тайфун” (Уйпуç, Çĕн Ирчемес), “Чи лайăх кĕрешекен” - А.Макаров (Хĕрлĕ Чутай), “Чи  лайăх кире пуканĕ йăтакан” - С.Мироновпа (Тумликасси) Э.Габдулхаева (Питĕркасси), “Чи лайăх йĕлтĕрçĕ” - С.Элеменкинпа (Хĕрлĕ Чутай) С.Кузьмина (Туктамăш), “Чи лайăх çăмăл атлет” - А.Сидоров (Çĕн Ирчемес), Н.Герасимова (СХТ), “Чи лайăх волейболист” - Ф.Михеев (Шĕмшеш), О.Родионова (Туктамăш), “Чи лайăх баскетболист” - А. Столярова (Хĕрлĕ Чутай), “Чи лайăх тренер” - А.Туйманов, “Чи лайăх физкультура учителĕ” - С.Петрейкина (Çĕн Атикасси шкулĕ), “Çулталăкри спорт спонсорĕ” - “Асамат” ТЯО (ертÿçи И.Н.Михопаров), “Чи лайăх спорт комментаторĕ” - А.М. Никитин, “Сывă пурнăç йĕркине  тытса пыракан çын” - Ю.И.Михайлов (Хĕрлĕ Чутай), “Спорт шкулĕнчи стендсене  лайăх йĕркелекен” - П.А. Кузьмин, “Районти чи лайăх спорт çемйи” - Вячеславпа Алевтина Дадюковсем.

Савăнăçлă уявра юрă-кĕвĕ тăхтавĕсем чылай пулнă.