Çак кунсенче районти çамрăксен спорт шкулĕ хăйĕн 25 çулхи юбилейне паллă тăвать. Çамрăксен спорт шкулне, нумай чухне эпир ăна кĕскен ДЮСШ тесе калама хăнăхнă, 1981 çулта ЧР Вĕрентÿ министерстви районти çамрăксен республикăри спорт ăмăртăвĕсенчи çитĕнĕвĕсем вăл вăхăтра витĕмлĕ пулнине шута илсе тата Чутай çĕрĕ çинче те талантлă спортсменсене мĕн ачаран тупса палăртса вĕсене малалла аталанма майсем туса парас тесе уçнă. Çакăн хыççăн, районти вĕрентÿ пайĕн хушăвĕпе килĕшÿллĕн, И.Я.Яковлев ячĕпе хисепленекен Чăваш патшалăх педагогика институтĕнче вĕренсе аслă пĕлÿ илнĕ пултаруллă спортсмена, ирĕклĕ майпа кĕрешес енĕпе «Спорт мастерĕн кандидачĕ» хисеплĕ ята тивĕçнĕ, Хĕрлĕ Чутай салин каччине Александр Николаевич Ярайкина çирĕплетнĕ. А.Ярайкинпа пĕрле çамрăксен спорт шкулĕнче Питĕркасси ялĕнче çуралса ÿснĕ, ачасене вĕрентме ирĕк паракан ятарлă вăтам пĕлÿ илнĕ ăста йĕлтĕрçĕсем Владимир Элеменкинпа Николай Судаков çамрăк педагогсем тренер пулса ĕçлеме тытăннă. Сăмах май, спорт ĕçне чун-чĕререн парăннă ăста специалистсем Владимир Федоровичпа Николай Васильевич паянхи кун та тăрăшса ĕçлеççĕ. Çавăн пекех çамрăксен спорт шкулĕн малтанхи тренерĕсен шутне Малиновка ялĕнче кун çути курнă Геннадий Огариновпа Петр Тверскова, Атнарти Борис Вазиковпа Владимир Кузнецова, Липовка ялĕнчи Геннадий Куропаткина, Хĕрлĕ Чутайри Андрей Фондеркина, Николай Законова тата Василий Ефимова, Тралькассинчи Иван Иванова, Турханти Николай Яковлева тата Штанашри Вячеслав Пахинова кĕртмелле. Вĕсем пурте çамрăксене физкультурăпа спорта юратма вĕрентес, вĕсенчен ăста спортсменсем ÿстерес тесе çанă тавăрсах ĕçленĕ.

Çамрăксен спорт шкулĕнче вĕренекен ачасен малтанхи çитĕнĕвĕсем, паллах, унăн пĕрремĕш директорĕ Александр Николаевич Ярайкин тренерсен ĕç коллективне ăнăçлă ертсе пынипе, хăйĕн ĕçри тивĕçĕсене тÿрĕ кăмăлпа туса пынипе тÿрремĕнех çыхăннă. Çавăнпа ăна паянхи кун та çамрăксен спорт шкулĕнчен тĕрлĕ çулсенче вĕренсе тухнă ачасем, хальхи вăхăтра пурнăç çулĕ тăрăх çирĕп вăй-халпа утакан çĕршер çамрăк тав сăмахĕ калаççĕ. Паянхи кун Александр Николаевич Шупашкарта пурăнать пулин те, тăван Чутай ене килсен яланах çамрăксен спорт шкулне çитсе ачасемпе, тренерсемпе тĕл пулса калаçма, сĕнÿсемпе канашсем пама вăхăт тупать.

Пĕр хушă районти çамрăксен спорт шкулне Атнарта çуралса ÿснĕ, аслă пĕлÿллĕ специалист Борис Прокопьевич Вазиков тата Хĕрлĕ Чутай çамрăкĕ, ĕçре тата спорт ăмăртăвĕсенче çирĕп вăй-хал пухнă спорт мастерĕ, аслă пĕлÿллĕ педагог Юрий Анатольевич Бронюков та ертсе пынă. Вĕсем иккĕшĕ те  нумай-нумай çамрăка спортра малтанхи утăмсем тума майсем туса панă, вĕсенчен чылайăшĕ республика, Раççей шайĕсенчи ăмăртусенче Чутай ен чысне хÿтĕленĕ. Пуринчен те ытларах вара, 15 çул хушши районти çамрăксен спорт шкулĕн ертÿçи пулса физкультурăпа спорт ĕçченĕ пулмах çуралнă, пур ĕçе те яваплăха туйса хăвăрт та тирпейлĕ туса пыма хăнăхнă, аслă пĕлÿ илнĕ Раççей Федерацийĕн спорт мастерĕн кандидачĕ Юрий Иванович Столяров ĕçлерĕ.

25 çул хушшинче çамрăксен спорт шкулĕнчен вĕренсе тухнă вуншар ача Чăваш Енре тата Раççейре паллă спортсменсем пулса тăчĕç. Вĕсенчен виççĕшĕ: Туктамăш хĕрĕ Елена Грузинова, Мучикассинче çуралнă Наталья Шивирева тата Тумликассинче çитĕннĕ Римма Ульянова тĕнче класлă спорт мастерĕсем. Уйрăмах Елена Грузинова çуллахи XXVI–мĕш Олимп вăййисене хутшăнса районти çамрăксен спорт шкулне чапа кăларчĕ.

Спорт мастерĕсен йышĕ те çав тери пысăк. Тĕрлĕ çулсенче çак хисеплĕ ята Карăкçырми ялĕнче çуралнă Раиса Шивирева, Хĕрлĕ Чутай хĕрĕпе каччи Надежда Гусельщиковапа Альфред Ульянов, Тралькассинче çитĕннĕ Юрий Майоров, Туктамăшри Алексей Шереметьев, Туканаш ялĕнче ÿссе çитĕннĕ Андрей Осипов тата Мучикассинчи Андрей Офишкин тивĕçлĕ пулчĕç. Раççей Федерацийĕн спорт мастерĕн кандидачĕсемпе I-мĕш разрядлă спортсменсем вара çак чĕрĕк ĕмĕр хушшинче çамрăксен спорт шкулĕнчен йышлăн вĕренсе тухса Чутай ен спорт чысне республикăри тата Раççей шайĕнчи ăмăртусенче чыслăн хÿтĕлеççĕ.

Паянхи кун районти çамрăксен спорт шкулĕнче штатра тăракан пултаруллă 14 тренер вĕрентсе пынипе 345 ача хăйĕн спортри ăсталăхне туптать, çав шутра 80-шĕ - çăмăл атлетсен, 87-шĕ - йĕлтĕрçĕсен, 79-шĕ - футболла вылякансен, 59-шĕ - волейболла вылякансен, 20-шер ача кире пуканĕ йăтакансен тата ирĕклĕ майпа кĕрешекенсен уйрăмĕсенче куллен тренировкăсене çÿресе сывлăхĕсене çирĕплетеççĕ, ăмăртусене хутшăнса спортри ăсталăхне ÿстереççĕ. Маларах асăннă тренерсенчен 5-шĕ аслă , 7-шĕ вăтам пĕлÿ илнĕ, 2-шĕ - I -мĕш, 9-шĕ II-мĕш категориллĕ специалистсем.

Хальхи вăхăтра районти çамрăксен спорт шкулĕн филиалĕсем Атнарти, Питĕркассинчи, Хĕрлĕ Чутайри, Мăн Этменти, Çĕн Атикассинчи вăтам тата Тралькассинчи, Хусанушкăнчи тулли мар вăтам шкулсенче ĕçлеççĕ е урăхла каласан, асăннă вĕрентÿ учрежденийĕсенче ăс пухакан ачасене тренерсем ертсе пынипе тăван шкулсенчех тренировкăсем ирттерме майсем туса панă.

Республика шайĕнчи ăмăртусене хутшăнакан ачасем пурте тенĕ пекех çамрăксен спорт шкулĕнче вĕренеççĕ. Пирĕн пултаруллă çамрăксем кашни çулах  Чăваш Республикин Президенчĕн Кубокне çĕнсе илессишĕн пыракан Спартакиадăн старчĕсене хастар хутшăнаççĕ. Кăçалхи вĕренÿ çулĕнче ирттернĕ ăмăртусенче пирĕн çамрăк спортсменсем республикăри 28 хулапа район командисем хушшинче шахматла выляссипе - 4-мĕш, сĕтел çинче теннисла выляссипе - 8-мĕш, кире пуканĕ йăтассипе - 11-мĕш, ирĕклĕ майпа кĕрешессипе -  14-мĕш, баскетболла выляссипе - 23-мĕш вырăнсене йышăнма пултарчĕç. Хальлĕхе Спартакиадăн кăтартăвĕсене пĕтĕмлетсен çакă курăнать: маларах асăннă пилĕк спорт ăмăртăвĕсенче пухнă очкосен хисепĕпе эпир 12-мĕш, пирĕнпе кÿршĕллĕ Элĕк - 15-мĕш, Çĕмĕрле - 26-мĕш, Етĕрне районĕсем 6-мĕш вырăнсенче пыраççĕ. Спартакиадăн пулас ăмăртăвĕсенче: йĕлтĕрпе чупассипе, çăмăл атлетика енĕпе тата волейболла, футболла, шашкăлла выляс енĕпе пирĕн çамрăксем лайăхрах кăтартусем кăтартасса шанас килет.

Районти çамрăксен спорт шкулĕн тренерĕсем пурте пуян опыт пухнă специалистсем. Вĕсем çитĕнекен ăрăва физкультурăпа  спорта явăçтарас тесе çине тăрса ĕçлеççĕ. Кăçалхи 2006 çулхи ĕç кăтартăвĕсемпе вара кире пуканĕ йăтакансен уйрăмĕнче вăй хуракан тренер, Раççей Федерацийĕн спорт мастерĕн кандидачĕ Аркадий Федорович Туйманов малти вырăна тухма пултарчĕ.

Çăмăл атлетсен уйрăмĕнче тăрăшакан Раççей Федерацийĕн спорт мастерĕн кандидачĕ Людмила Алексеевна Михуткина ĕçне те лайăх енчен палăртса хăвармалла. Йĕлтĕрçĕсен уйрăмĕнче тăрăшса ĕçлекен тренерăн Вячеслав Витальевич Дадюковăн спорт çемйи вара кăçалхи çулла Раççей шайĕнчи ăмăртусенче çитĕнÿ туни районти çамрăксен спорт шкулне чыс тăвать.

Çамрăксен спорт шкулĕн пурлăх бази кашни çулах çирĕпленсе пынине те палăртма кăмăллă. Иртнĕ вĕренÿ çулĕнче кăна çамрăк та пултаруллă спортсменсене район администрацийĕ 50 пин тенкĕлĕх спорт инвентарĕ илсе парса савăнтарчĕ.

Юлашкинчен Сире пурне те, хисеплĕ вулаканăм, çамрăксен спорт шкулĕн савăнăçлă уявне пырса курма чĕнетĕп. 25 çулхи юбилей ячĕпе иртекен уяв эрне кун, декабрĕн 15-мĕшĕнче, районти культурăпа кану центрĕнче иртĕ. Пуçламăшĕ 18 сехетре.