Иртнĕ эрне кун Хĕрлĕ Чутай гимназийĕ хăйĕн 185 çулхи юбилейне паллă турĕ. Çак юбилее халалласа гимнази коллективĕпе вĕренекенсем чаплă уяв хатĕрленĕ.

Ирхи вунă сехет тĕлне гимназие тĕрлĕ çулсенче алла аттестат илсе шкулпа сыв пуллашнисем, хăнасем, учитель-ветерансем, шкулта ĕçлеме тÿр килнисем, паянхи вĕренекенсен ашшĕ-амăшĕсем пухăнма пуçларĕç. Уяв программипе килĕшÿллĕн, килсе çитнисене гимнази столовăйĕнче чейпе хăналарĕç. Унтан кашнин гимназипе паллашма, вĕрен­нĕ классене çитсе курма, вĕрентекенсемпе тĕл пулма май пулчĕ.

Хам та çак шкулта вăтам пĕлÿ илнĕ май, гимнази юлашки çулсенче самаях илемленнине палăртма кăмăллă. Çакна чылай выпускник çирĕплетсех каларĕç. Музей пурри вара чăн-чăн пуянлăх.  Ăна 2004 çулхи декабрь уйăхĕнче уçнă. Пуçарса яраканĕ - районта кăна мар, республикăра та паллă, РФ Президенчĕн грантне тивĕçнĕ Е.Н.Орлова биологи учителĕ. Музейри экспонатсенчен пĕрисем Елена Николаевнан коллекцийĕнчен, теприсене хăнасем парнеленĕ, хăшĕ-пĕрисене ачасем тупнă е хатĕрленĕ. Калас пулать, музей пÿлĕмĕнче экскурсисем кăна мар, интереслĕ уроксем те иртеççĕ иккен. Уяв кунне вара 11 класра вĕренекен А.Журавлева, А.Калейкина тата Р.Чишкина хĕр пикесем хăнасемпе тĕрлĕ ÿсĕмри выпускниксене музейри тĕрлĕ уйрăмсемпе интереслентерчĕç. Кунта ÿсен-тăрансен, тĕрлĕ чĕр-чунсемпе кайăксен тĕнчисен пуянлăхĕпе паллашма май пулчĕ.

Гимназин иккĕмĕшпе виççĕмĕш хутĕнче те кăсăкланмалли чылай. Тĕрлĕ вĕренÿ çулĕнче шкул пĕтернисен сăн ÿкерчĕкĕсене пăхнă май, палланисене, темиçе çул тĕл пулманнисене курма питех те кăмăллă ĕнтĕ. Унсăр пуçне кашни класс ачисем хăйсен пурнăçĕпе паллаштаракан стендсем хатĕрленĕ. Рефератсемпе тĕрлĕ ал ĕçĕсен куравĕсем те уявра паллă вырăн йышăнчĕç.

Кашни пилĕк çуллăхра вĕренсе тухнисене валли уйрăм кабинет хатĕрленĕ. Унта выпускниксем пĕр-пĕринпе тĕл пулса шкул çулĕсене аса илме, кашнин пурнăçĕпе интересленме пултарчĕç. Сăмах май, гимназин 185 çулхи юбилейне пурĕ 29 учитель-ветеран тата йыхравпа 18 выпускник килсе çитнĕ. Вĕренсе тухса Чутайрах тĕпленнисен шучĕ те çук. Калас пулать, маларах шкул пĕтернисенчен уява 1955 çулхи выпускник Римма Афанасьевна Петрова килнĕ. Кăшт каярах вĕренсе тухнисенчен Л.А. Гизятова (1961ç. выпускникĕ),  Л.А.Трофимова (1965ç.), Ф.А.Храмова (1967ç.) тата ыттисем пур. Пурнăçĕсене ачасене вĕрентес ĕçе халалланисенчен вара аслăраххи, нумаях пулмасть 80 çулхи юбилейне паллă тунă Р.С.Жигулева пулнине палăртмалла. Çавăн пекех Анатолий Степановичпа Генриета Александровна Моисеевсем, Виталий Андреевич Стекольщиков тата ыттисем те уява çитме васканă.

Унтан пурте ял тăрăхĕсем хушшинчи культурăпа кану центрне çул тытрĕç. Уяв программине пуçламăш класс хĕр ачисем шÿтлĕ ташăпа пуçларĕç. Вĕсем хыççăн куракансене Н.В.Мидакова тата Л.А. Кашкирова педагогсем “Вечер школьных друзей” кăмăллă юрă парнелерĕç. 9-мĕш класра ăс пухакан О.Тимофеева “Чувашия” юрра шăрантарса асра юлчĕ.

Уява малалла гимнази ăшшине тытса тăракан, унăн ĕçĕсене йĕркелесе пыракан Р.Н.Ильина директор сăмах илсе тăсрĕ. Вăл коллектив умĕнче тăракан тĕп задачăсене палăртнă хыççăн Хĕрлĕ Чутай шкулĕ утса тухнă пурнăç çулĕ çинче тĕплĕн чарăнса тăчĕ. Çавăн пекех Раиса Николаевна хальхи кăтартусемпе паллаштарчĕ. Акă, пурĕ паянхи куна гимназире 652 вĕренекен ăс пухать, 28 комплект класс шутланать. Пĕлтĕрхи выпускниксенчен 51 проценчĕ студент пулса тăнă, кăçалхисем - 54 процент. Çулсеренех шкул ачисем районта кăна мар, республикăра та тĕрлĕ предметсемпе иртекен  олимпиадăсенче аван кăтартусемпе палăраççĕ. “Зарница” тата “Орленок” çарпа патриотизм вăййисенче те вĕсем яланах тенĕ пек малта. Учительсем те гимнази чысне çулран-çул çÿле çĕклеççĕ. Акă, кăçал Е.Н. Орловапа Э.В.Романов педагогсем РФ Президенчĕн грантне тивĕçрĕç.

Раиса Николаевна гимназин 190 çулхи юбилейĕ тĕлне шкул историйĕ пирки кĕнеке кăларма пурне те пĕрле тăрăшма сĕнчĕ. Ун хыççăн вăл уява пухăннисене юбилей ячĕпе килсе çитнĕ саламлă телеграммăсемпе паллаштарчĕ. Вĕсене пирĕн ентеш,  Президент Администрацийĕн ĕçченĕ Л.В.Белов, тĕп хуламăрти Çамрăксен театрĕн режиссерĕ В.Оринов, 1974 çулхи выпускник В.Г.Орлов, Чутай шкулĕнче ĕçлеме тÿр килнĕ И.И.Стекольщикова, 1955 çулхи выпускник Ю.Мазуркин, Г.А.Яковлев профессор  уяв ячĕпе чĕререн саламласа, ăнăçусем сунса çырнă. Р.И.Ильина ачасене вĕрентес ĕçре ырми-канми тăрăшнă, чăннипех хисепе тивĕçлĕ ветерансене, шкулта ĕçлесе тивĕçлĕ канăва тухнисене чунтан тухакан тав сăмахĕсем каларĕ. Шкул ачисем вара вĕсене чечек çыххисем парнелерĕç. Каярахпа Раиса Николаевна юбилей умĕн ирттернĕ “185 “5” паллăсем” конкурсра çĕнтернĕ классене Хисеп грамотипе чысларĕ.

Хĕрлĕ Чутай гимназийĕн юнармеецĕсем çар вăййисен вăрттăнлăхĕсемпе куракансен кăмăлне тыткăнланă хыççăн район пуçлăхĕ А.И.Криков сăмах илчĕ. Вăл Хĕрлĕ Чутай шкулĕ икĕ ĕмĕре яхăн ĕçленĕ ятпа пурне те ăшшăн  саламларĕ, гимнази районти кăна мар, республикăри лайăх вĕрентÿ заведенийĕсенчен пĕри пулнине палăртрĕ. Александр Иванович 1978 çулхи выпускник пулнă май, хăй çак шкулта ăс пухнăшăн мухтаннине те савăннине пĕлтерчĕ. Вăл 1976-1978 çулсенче çĕнĕ шкулта вĕреннĕ иккен. Александр Иванович пĕлтернĕ тăрăх, вĕсем шкул садне хывнă. Халĕ  вăл çулсерен хăйĕн çимĕçĕсемпе савăнтарать. Юбилей ячĕпе вара А.И. Криков гимназие паянхи пурнăç таппипе тан пыма, вĕрентÿ шайне çĕклеме интерактивлă доска парнелерĕ. “Çакăн пек оборудовани Чăваш Енри шкулсенче халĕ иккĕ пулать, мĕншĕн тесен пĕрремĕшне ЧР Президенчĕ Н.В.Федоров кăçалхи вĕренÿ çулĕн пуçламăшĕнче Етĕрнере парнелерĕ”, - пĕлтерчĕ Александр Иванович. Сăмах май, асăннă доска гимназин 302-мĕш кабинетĕнче, информатика урокĕсем иртекен пÿлĕмре вырăн тупать. Унтан район администрацийĕн ертÿçи А.И.Криков ветерансене, шкулта ĕçленисене, паянхи кун тăрăшакан учительсене чысларĕ. А.С.Моисеев, И.Т.Ванюшкин, А.И.Дерстуганов, Ю.Н. Шереметьев, В.Д.Михеркин, А.И. Прокопьев, Н.Т.Котеева, Н.С.Абакумова, В.А.Кудряшова, Г.К.Тимакова, Т.М.Сятрайкина, Р.Г.Галимов, Э.С.Михеева, А.А.Романова, О.С. Кузьмина тата З.П.Мастеркина райадминистрацин Хисеп грамотине тивĕçрĕç. Çавăн пекех Александр Иванович гимназие тăван тавралăха упрас ĕçе активлă хутшăннăшăн, йывăç-тĕм ытларах лартса хăварса мала тухнăшăн ЧР тава тивĕçлĕ вăрман ĕçченĕ М.А.Овчинников ячĕпе хисепленекен район пуçлăхĕн премийĕпе чысларĕ.

ЧР Патшалăх Канашĕн депутачĕ Н.В.Малов та 185 çулхи юбилей ячĕпе саламласа чылай ăшă сăмах каларĕ, музыка центрĕ тата лайăх вĕренекен ачасем валли Хусана çул çÿрев парне турĕ. Унăн саламĕ çумне район пуçлăхĕн пĕрремĕш çумĕ, районти вĕрентÿ пайĕн начальникĕ Т.Н.Шереметьева хутшăнчĕ. Вăл гимнази ырă йăласене малалла тăсни, ытти шкулсем хушшинче малта пулни, ресурс центрĕ шутланса тăни, пурлăх бази енчен çирĕп пулни çинчен пĕлтерчĕ, малашне те аталанса пыма, кăтартусемпе савăнтарма ырлăх-сывлăх, ăнăçу сунчĕ. Татьяна Николаевна тĕрлĕ тĕслĕ кăтартакан телевизор парнелерĕ.

Салампа тата парнепе çитнĕ районти ертÿçĕсем сахал мар пулнине палăртмалла. Акă, райадминистрацин вĕрентÿ пайĕн профсоюз комитечĕпе социаллă аталану пайĕ, ЧР Финанс министерствин районти уйрăмĕ, Перекет банкĕ, казначейство, “Быт”, тĕп больница, райпо, Питĕркасси шкулĕ, Хĕрлĕ Чутай ял тăрăхĕ, ял тăрăхĕсем хушшинчи культурăпа кану центрĕ, “Энергобаланс” ТЯО-н районти участокĕ, ял тăрăхĕсем хушшинчи тĕп библиотека, “Пилеш” ача сачĕ тата ытти хăш-пĕр организацисенчен уяв  кун парне пулчĕ. Çавăн пекех палăртмалла, гимназин кашни класăн ашшĕ-амăшĕсен комитечĕсем юбилей ячĕпе парне хатĕрленĕ. “Пĕр­лĕхлĕ Раççей” партин Чăваш Енри уйрăмĕ те гимназие парне тума манмарĕ.

Уяв программине  тăтăшах шкул ачисен кăмăллă юррисемпе ташшисем пуянлатрĕç. Унсăр пуçне гимназин кун-çулĕпе, паянхи пурнăçĕпе паллаштаракан презентаци пурри паха пулчĕ. Çавăн пекех тĕрлĕ çулсенче Хĕрлĕ Чутай шкулне пĕтернĕ выпускниксем сăмах илсе 185 çулхи юбилей çит­нĕшĕн савăннине, хăйсем çак шкултан вĕренсе тухнишĕн мухтаннине пĕл­терчĕç, пĕлÿ тĕнчипе паллаштарнă учительсене тав туса пуç тайрĕç. Уяв чылайччен тăсăлчĕ, унтан ветерансемпе хăнасене уяв  сĕтелĕ кĕтрĕ. Пĕтĕ­мĕшле илсен, ветерансем те, выпускниксем те кăмăллă юлчĕç.

Шăмат кун та гимназире уяв сĕмĕ, савăнăçлă кăмăл иксĕлми пулчĕ. Вĕренекенсем çак кун презентаципе паллашрĕç, уяв программине ÿкернĕ видео курчĕç.