Ноябрĕн 30-мĕшĕнче районти  ял тăрăхĕсем хушшинчи культурăпа кану центрĕнче Афган тата Чечен вăрçисенче пуçĕсене хунă паттăр салтаксене Г.Ивановпа Ю.Макарова, С.Эзенкина халалланă патриотла çар юррисен виççĕмĕш конкурс-фестивалĕ иртрĕ. Ăна Хĕрлĕ Чутай гимназийĕн вĕренекенĕсем Регинăпа Рената Чишкинасем ертсе пычĕç.

Фестивале Хĕрлĕ Чутай гимназийĕнче вĕренекен яшсем уçрĕç. Вĕсем, çар тумĕсем тăхăннăскерсем, куракансене спортпа çар вăййисен тĕрлĕ мелĕсемпе тыткăнларĕç. Районти искусство шкулĕн преподавателĕсем илемлĕ юрă парнелерĕç.

Район администрацийĕн пĕрремĕш çумĕ, вĕрентÿ пайĕн начальникĕ Т.Н.Шереметьева воин-интернационалистсен ырă ячĕсем ĕмĕр  халăх асĕнче пулассине палăртрĕ, конкурсантсене ăнăçу сунчĕ. Районти çар ĕç комиссарĕн çумĕ О.И.Петров воин-интернационалистсене халалланă çар юррисен фестивальне ирттерни çамрăксене патриотизмла воспитани парас ĕçре пысăк витĕм кÿни пирки каларĕ. Фестивальре В.Хохловпа А.Хозайкин воин-интернационалистсем те сăмах илчĕç, мероприятие йĕркелекенсене чĕререн тав турĕç.

Жюри членĕсем çамрăк юрăçсен пултарулăхне тимлĕн тишкерчĕç, тивĕçлĕ хак пачĕç. Палăртмалла, хак панă чухне вĕсем ытларах юрăсен тематикине, çи-пуç килĕшĕвне, пултарулăха,  куракансен кăмăлне кайнине  шута илчĕç. Юрă-çке çынна вăй-хал кĕртет, хавхалантарать. Çар тата Тăван çĕршыв çинчен хывнă юрăсем вара чун-чĕресенче паттăрлăх, хăюлăх туйăмĕсем çуратаççĕ, тăван çĕре-шыва хисеплеме, юратма вĕ­рен­­теççĕ. Çамрăк чунсенче çак туйăмлăх нихăçан та ан çухалтăр тесе ирттереççĕ те ĕнтĕ патриотла çар юррисен фестивальне.

Темăпа çыхăннă юрăсем чылай янăрарĕç. Художество пултарулăх ертÿçисем конкурса тивĕç­лĕ хатĕрленнĕ. Çапла майпа вара, чи кĕçĕннисен ушкăнĕнче (7-11 çулхисем) пĕрремĕш вырăна А.Мигушкин (Атнар) тивĕçрĕ, иккĕмĕш - М.Шуськин (Атнар), виççĕмĕш - Е.Ильина (Штанаш). Вăтам ушкăнрисенчен (12-14 çулхисем) пултаруллăрах Е.Волков (Атнар) пулчĕ, иккĕмĕшпе виç­çĕмĕш вырăнсене О. Скворцовапа (Тралькасси) О.Тимофеева (Хĕрлĕ Чутай гимназийĕ) тивĕç­рĕç. Аслисен ушкăнĕнче чи лайăх юрăç К.Логинова (Штанаш) пулчĕ, иккĕмĕш - Р.Чишкина (Хĕрлĕ Чутай), виççĕмĕш - В.Волкова (Атнар). Çавăн пекех Хĕрлĕ Чутай гимназийĕнче ăс пухакан Д.Спиридонова çамрăк юрăç куракансен кăмăлне кайнипе палăрса юлчĕ, Дипломпа премие тивĕçрĕ. Кив Атикассинче çуралса ÿснĕ, Мăн Этменти шкулта пĕлÿ илекен Н.Аксакова гран-при çĕнсе илчĕ.

Жюри членĕсем ачасен художество пултарулăхне аталантарассишĕн тăрăшса ĕçленĕ  педагогсене тав турĕç, искусство шкулне Диплом парса чысларĕç. Çавăн пекех ытти коллективри илем­лĕх ертÿçисене те активлăх кăтартнăшăн ырăпа асăн­чĕç.

Шел те, çакăнтах фестивале хутшăнман коллективсене асăнмалла. Акă, Хусанушкăнь, Пантьăк, Питĕркасси ял тăрăхĕсенчен пултарулăх ушкăнĕсем фестивале килсе çитеймен, çавăнпа унти çамрăк юрăçсен таланчĕсемпе паллашма май килмерĕ.