Иртнĕ эрнере районти ачасемпе çамрăксен спорт шкулне спорта кăмăллакансем йышлă пухăнчĕç. Кунта кире пуканĕ йăтассипе ЧР Президенчĕн Кубокне çĕнсе илессишĕн зонăри турнир иртрĕ. Тупăшăва Хĕрлĕ Чутай, Етĕрне, Çĕмĕрле районĕсенчи тата Çĕмĕрле хулинчи пăхаттирсем хутшăнчĕç.

Ăнăçлă иртсе пычĕ вăйлисен, çирĕп вăй-халлисен тупăшăвĕ-турнирĕ. Хĕрлĕчутайсем кире пуканĕ йăтассипе маттур пулнине ку хутĕнче те аван кăтартса пачĕç, çивĕч кĕрешрĕç.  65 килограмм таякан атлетсем хушшинче малти вырăна Хĕрлĕ Чутай гимназийĕнче вĕренекен Алексей Балалайкин тивĕçрĕ, иккĕмĕш - Александр Храмов (Çĕн Атикасси шкулĕ). Çак виçерен çăмăлраххисен ушкăнĕнче Владимир Кузнецов (Çĕн Атикасси) иккĕмĕш  пулчĕ.

70 килограмлă спортсменсенчен Алексей Савельев (Атнар шкулĕ) виççĕмĕш вырăна тухрĕ.

75 килограмм таякан атлетсен ушкăнĕнче Геннадий Кузнецов (Çĕн Атикасси) виççĕмĕш вырăна çĕнсе илме пултарчĕ. Йывăр виçеллĕ спортсменсен ушкăнĕнче, 80 килограмлисем хушшинче, Çĕн Атикасси шкулĕнче пĕлÿ пухакан Георгий Кузнецов çĕнтерÿçĕ пулчĕ. Унтан та йывăр таякан спортсменсенчен пултарулăхпа Анат Çĕрпÿкасси каччи, анчах вăл Етĕрне районĕнче ăс пухать, Сергей Терентьев палăрчĕ.

Командăсем тăрăх илсен, пĕрремĕш вырăна Етĕрне район спортсменĕсем çĕнсе илчĕç, иккĕмĕш - хĕрлĕчутайсем, виççĕмĕш - Çĕмĕрле районĕ, тăваттăмĕш - Çĕмĕрле хули.

Çĕнтерÿçĕсене пурне те Хисеп грамоти парса чысларĕç.