Выльăх-чĕрлĕхе витесенче тăрантарса усрамалли тапхăр пуçланчĕ. Ферма ĕçченĕсем хĕллехи уйăхсенче выльăхсенчен продукци илессине чакарас мар тесе тăрăшаççĕ. Çак тĕллевпе ĕçлесе пырсан ÿсĕм тума пулать. Ăçта çакна ăнланса ĕçлеççĕ, ăçта ячĕшĕн çеç тăваççĕ;

Районти выльăх-чĕрлĕх отраслĕн 10 уйăхри кăтартăвĕсем çапларах: 678 тонна аш-какай (90 процент), 4968 тонна сĕт (99 процент) туса илнĕ. Фермăсенчен продукци илесси, пĕл­тĕрхипе танлаштарсан, пĕчĕкрех. Çакă хуçалăхсенче ĕне выльăх шучĕ чакса пынипе çыхăннă. Анчах «Коминтерн» ЯХПК-ра аш-какай туса илессине 120 процент таран пурнăçланă.  Кăçал сĕт суса илессине, иртнĕ çулхипе танлаштарсан, «Свобода» (27 процент), «Нива» (27 процент) хуçалăхсенче, В.Никитин фермер хуçалăхĕнче (20 процент) ÿстернĕ. Ку ÿсĕм асăннă хуçалăхсенчи ферма ĕçченĕсемпе зооветспециалистсем хĕрÿ ĕçленипе, çирĕп тĕллевсемпе малалла ăнтăлнипе çыхăннă.

Районĕпе пĕр ĕнерен сĕт сăвасси вăтамран 2915 килогрампа танлашнă. «Свобода» колхозра - 4034 килограмм, В.Никитин фермер хуçалăхĕнче - 3754, «Аккозинский» - 3575, «Коминтерн» - 3557, «Нива» - 3144, ыттисен пĕчĕкрех. Çулталăк вĕçлениччен сĕт туса илессине татах та ÿстермелле. Мĕншĕн тесен кашни ĕнерен 3500 килограмм сĕт суса илсен патшалăх кашни ĕне пуçне 1200 тенкĕ, 4000-4500 килограмшăн - 1350 тенкĕ, 4500-5000 килограмшăн - 1500 тенкĕ тата ытларах продукци илсен 1600 тенкĕ хушма тÿлев парса пулăшать. Çавăнпа та патшалăх пулăшăвĕпе усă курассишĕн пур хуçалăхра та тăрăшса ĕçлемелле.

Ĕне выльăх самăртассипе, чĕрĕ ÿт хуштарассипе ÿсĕмсем япăх мар. 10 уйăхра талăкра мăйракаллă шултра выльăхсем вăтамран 503 грамм ÿт хушнă, сыснасем - 372. Ĕне выльăхсене чĕрĕ ÿт хуштарассипе уйрăмах «Коминтерн» (685 грамм), «Нива» (647), «Свобода» (627) хуçалăхсенчи ферма ĕçченĕсем тăрăшарах ĕçлеççĕ. «Коминтерн» ЯХПК-ри сыснасем куллен 464 грамм ÿт хушаççĕ. Шел те, выльăх-чĕрлĕх самăртассипе «Путь Ильича» (332 грамм), «Искра» (337), «Сура» (320) хуçалăхсенче япăхрах ĕçлесе пыраççĕ.

Кăçал 10 уйăхра ĕнесенчен пурĕ 1581 пăру илнĕ, кашни 100 ĕне пуçне 78 пăру тивет. Çулталăк вĕçне çак кăтарту 90-95 пăрупа танлашмалла. Кашни 100 ĕне пуçне 30-35 тына пăруран кая мар пĕтĕлентерсе хăварма та тăрăшмалла. Тына пăрусене пĕтĕлентерессипе «Победа», «Нива», «Искра», «Путь Ильича» хуçалăхсенчи зооветспециалистсен кăтартăвĕсем пĕчĕк. Çитес çул сăвăма ÿстерес тесен ĕнесене декабрь, январь, февраль, март уйăхĕсенче пĕтĕлентерсе хăварма тăрăшмалла. Çавăн чухне çеç хĕлĕпе, çăвĕпе сĕт суса илме пулать.

Продукци илесси витесене хĕле мĕнле хатĕрленинчен те нумай килет. Хуçалăхсенче фермăсене хĕле хатĕрлессипе мĕнле ĕç­лерĕç-ха; Тĕпрен илсен, фермăсем хĕле хатĕр. «Коминтерн» ЯХПК-ра витесене йĕркене кĕртессипе, çĕнĕ цехсем хута ярассипе тăрăшса тимлеççĕ. Акă, сентябрь уйăхĕнче сысна ферминче 60 пуç хупса усрамалли-çурлаттармалли вите хута кайрĕ. Ноябрь уйăхĕн вĕçнелле 254 пуç сысна усрамалли тепĕр вите туса çитерме тĕллев лартнă, ĕçсем пыраççĕ. Сăмах май, паянхи куна асăннă хуçалăхра пурĕ 1093 пуç сысна шутланать. Çитес çул вĕсен шутне 3000 пине çитерме тĕллев лартнă. Çакă пĕтĕмпех продуктивлăха ÿстерессипе çыхăннă.

«Победа» ЯХПК-ра вара вăкăрсен витинче тислĕк хуçаланать. Пăрусем чĕр куççи таран тислĕк çинче тăраççĕ. Кун пирки хуçалăх ертÿçи А.Н. Давыдов мĕн шутлать-ши; «Аккозинский» хуçалăхра хĕл халех çитмест-ха тесе шутлаççĕ курăнать, паянхи кун та тына пăрусене урамри картара тытаççĕ. Япăх условисенче пăрусене ÿт хуштарасси йывăррине ăнланмаççĕ мар ĕнтĕ вĕсем. Хуçалăх ертÿçисемпе зооветспециалистсен пĕр тĕллевпе ĕçлесе пымалла, аш-какай тата сĕт туса илессине ÿстермелле, выльăхсен апат рационне пуянлатмалла. Кирлĕ пулсан, Етĕрнерен пăрака турттарассине йĕркелемелле. Выльăхсем çине «выльăхла» пăхнă çĕрте продукци ÿсмест. Выльăхсем те хăйсене пăхнине юратаççĕ. Ăçта тулăх апат, ăшă вите, унта продуктивлăх та пысăк.