Светлана Никандровна Герасимова Тури Çĕрпÿкассинчи тĕп шкулта 28 çул ĕçлет ĕнтĕ, ачасене вырăс чĕлхипе литература предмечĕсене вĕрентет. Вăл - пĕр­ремĕш категориллĕ педагог.

Паянхи пурнăç вара педагогсем умне уйрăмах çирĕп тĕллевсем лартать: вĕренекенсен пĕлÿ туртăмне инноваци технологийĕсемпе усă курса аталантарасси, ачасен творчествăлла хастарлăхне, тавра курăмне ÿстересси, вĕрентÿ технологийĕн çĕнĕ идейисемпе мелĕсене алла илесси тата ытти те. Ял учителĕн ĕçĕ вара пушшех те йывăр: çемье, кил-çурт, хушма хуçалăх... Апла пулин те С.Н.Герасимова пĕтĕм чун-чĕререн, пысăк хавхаланупа ачасене çирĕп пĕлÿпе тивĕçлĕ воспитани парассишĕн тăрăшать, хăй те вĕçĕмех пĕлĕвне анлăлатать, çĕнĕлĕхсемпе паллашса вĕренÿре усă курать, инноваци программисен конкурсĕсене хутшăнать. Пĕр сăмахпа каласан, вăл яланах шыравра. Иртнĕ вĕренÿ çулĕнче С.Н.Герасимова районти шкулсем хушшинче иртнĕ “Чи лайăх класс ертÿçи” конкурса хутшăнса “Учитель шухăшлавçă” номинацире çĕнтерÿçĕ ята тивĕçнĕ. Çакă ял учителĕн ят-сумне самаях ÿстерчĕ.

Учителĕн ĕç пахалăхĕ аслă шкулсене миçе çамрăк вĕренме кĕнинчен лайăх курăнать. Светлана Никандровна вĕрентсе кăларнă ачасенчен чылайăшĕ аслă пĕлÿ илнĕ, пурнăç çулĕ çине тăнă. Эпĕ  хам та, унăн вĕренекенĕ пулнă май, çакна çирĕплетсех калама пултаратăп. С.Н.Герасимова хăй вăхăтĕнче пирĕн класс ертÿçи пулнă. Вăл -  ĕçе чунтан парăнса туса пыракан педагог. Унăн вĕренекенĕ пулнипе мухтанатпăр, пире тивĕçлĕ воспитани парса ÿстер­нĕшĕн хисеплĕ учителе тав тăватпăр, вăрăм кун-çул, çирĕп сывлăх сунатпăр.

Светлана Никандровна мăшăрĕпе 4 ачана кун çути парнеленĕ. Аслă хĕрĕ амăшĕн профессине суйласа илнĕ, иккĕмĕш хĕрĕ те Шупашкарта аслă вĕренÿ заведенийĕнче пĕлÿ пухать, кĕçĕннисем - шкул çулĕсенче.

Хисеплĕ вĕрентекенĕмĕрĕн ĕçри пултарулăхĕ, аталанăвĕ тата çитĕнĕвĕ яланах çÿллĕ шайра пултăр, вăл вĕрентсе кăларнă ачасен пуласлăхĕ телейпе çиçтĕр.