Çынсем гриппа чирлес вăхăт çывхарчĕ. Çак чире пĕчĕк ачасемпе ватă çынсем уйрăмах йывăррăн ирттереççĕ. Грипп вăхăтĕнче вăл шала кайсан, çын ытти йывăр чире те çаклатма пултарать (тĕслĕхрен, ÿпке шыççине тата ытти те). Çавăнпа та унран сыхланассине тĕпе хумалла. Çав мероприятисенчен пĕри вăл - прививка.

Пирĕн районта ноябрĕн 2-мĕшĕ тĕлне пĕтĕмпе 4145 çынна грипран прививка тунă: вĕсенчен 465-шĕ ача сачĕсене çÿрекенсем, 729-шĕ - 1-4-мĕш классенче вĕренекенсем, 243-шĕ - медицина ĕçченĕсем, 600-шĕ шкулсенче ĕçлекенсем, икĕ пинĕ - 60 çултан иртнĕ ватăсем. Çакна та асăнмалла: ытти граждансен грипран прививка тутарас килсен, районти тĕп больницăн инфекци пÿлĕмне пымалла.

Грипп чирне тĕрлĕ вируссем пуçарса яраççĕ. Ытларах чухне вăл А-1, А-2, В тата С вируссемпе çыхăннă. Вĕсем вара сывă çыннăн организмне чирлисем ÿсĕрнĕ е сунасланă чухне лекеççĕ. Çавăн пекех чирлĕ çыннăн ал шăллийĕпе, сăмса тутрипе, савăт-сапипе усă курсан та ерет. Çакăн хыççăн пĕр е икĕ талăкран çыннăн ÿт-пÿ температури хăпарать, ăна шăнтать, вăл сунаслама пуçлать. Хăшĕ-пĕрисем чире çăмăллăнах ура çинчех чăтса ирттереççĕ. Анчах та вĕсем грипа ытларах сарăлма пулăшаççĕ. Нумайăшĕ вăхăт çитичченех сипленме пăрахать. Çакă вара хăрушă. Ун пек чухне çын ÿпке шыççипе тата хăлха пăсăлнипе аптăрать.

Чирлĕ çыннăн апата уйрăм савăт-сапаран çимелле. Сунасланă е ÿсĕрнĕ чухне сăмсана, çăвара сăмса тутрипе хупламалла. Усă курнă япаласене вĕретсе çумалла. Пÿлĕме час-часах уçăлтармалла. Чирлĕ çын таврашĕнчи сĕтел-пукана, япаласене хлорамин ирĕлчĕкĕпе йĕпетсе шăлмалла, урайне таса тытмалла. Пĕр литр шыв çине пĕр чей кашăкĕ хлорамин ямалла.

Чирлĕ çынна тĕрлĕ антибиотиксем, сульфаниламидсем памалла мар. Çак эмелсем грипран нимĕнле усă та памаççĕ, сиен çеç кÿме пултараççĕ. Ун вырăнне лимонпа, хăмла çырли варенийĕпе е пылпа чей ĕçмелле. Каçсерен урана горчицăпа ăшă ванна туни аван. Пуç хытă ыратсан, çамка çине сивĕ шывпа йĕпетсе тутăр хумалла.