Тралькассинчи Культура çуртĕнче тăрăшакансем хăйсен территорийĕнчи çамрăксен канăвне интереслĕ ирттерме тăрăшаççĕ. Çавна май яшсемпе, хĕрсемпе тĕрлĕ мероприятисем, конкурссем, вăйăсем йĕркелеççĕ. Октябрĕн 21-мĕшĕнче кунта «Ле­ди-кĕркунне» ятпа конкурс иртрĕ. Ăмăртăва Мучикассипе Тралькасси ялĕсенчи яштака кĕлеткеллĕ, хитре сăн-питлĕ хĕр-упраçсем: Татьяна Галкина, Галина Воронцова, Оксана Чернова, Екатерина Ерофеева хутшăнчĕç, пухăннисене хăйсен илĕртÿлĕхĕпе тыткăнларĕç. Конкурсанткăсен ăсталăхне вара жюри членĕсем: Тралькасси ял тăрăхĕн пуçлăхĕ А.Мурайкин, ял тăрăхĕсем хушшинчи культурăпа кану центрĕн пултарулăх ертÿçи О.Сергеева хакларĕç.

Пĕрремĕш конкурс пикесем хăйсемпе паллаштарнинчен пуçланчĕ. Тĕрлĕ мелсемпе усă курса вĕсем хăйсен сăнарне çутатса пама тăрăшрĕç. Ку конкурсра пурте 5 балл илме пултарчĕç.

Килти ĕçе хĕрсем аван хатĕрленнĕ. Уйрăмах О.Чернова ăсталăхпа палăрчĕ. Вăл Т.Буланова юрăçăн «Ан макăр» юррине чуна пырса тивмелле шăрантарчĕ. Çавăнпах пулĕ Оксанăна жюри членĕсем пысăк хак пачĕç. Т.Галкина вара пухăннисене хĕвел тухăç ташшине парнелерĕ. Йăл кулăллă, хитре пике 5 балл çĕнсе илчĕ. Конкурсанткăсенчен чи кĕçĕнни, 13 çулти Е.Ерофеева хăй ыттисенчен нимĕнпе те кая юлманнине çирĕплетсе ташăпа тухрĕ. Куракансем тăвăллăн алă çупни Катьăн ташши вĕсен кăмăлне кайнине пĕлтерчĕ.

Хĕр-упраçсем ситуациллĕ самантсенче хăйсене мĕнле тытнине, вĕсен тавра-курăмне, ăс-тăнне ытти конкурссем кăтартса пачĕç. Çапла майпа, 5 конкурс витĕр тухса «Леди-кĕркунне» ята О.Чернова çĕнсе илчĕ, вăл 75 балл пухса пĕрремĕш вырăна тивĕçрĕ, «Леди-илĕр­тÿлĕх» - Т.Галкина, «Леди-хитрелĕх» - Е.Ерофеева, «Леди-сăпайлăх» - Г.Воронцова. Конкурсанткăсене пурне те парнепе хавхалантарчĕç.

Конкурссем хушшинче Тралькасси шкулĕнче вĕренекен Е.Мурайкинапа Д.Бродюкова юрăсем шăрантарчĕç.