Октябрь уйăхĕнче обществăлла выльăх-чĕрлĕхе витесенче тытса усрас тапхăр пуçланчĕ. Колхозсемпе ял хуçалăх кооперативĕсем хĕл кунĕсене мĕнле хатĕрленнĕ-ха; Выльăхсен продуктивлăхне хĕл кунĕсенче те чакармасан ÿсĕм тума пулать. Ăна пурнăçлама вара выльăх апачĕ ытларах янтламалла, витесене хатĕрлемелле. Çак çивĕч ыйтусене районта мĕнле татса панă-ха;

АПК предприятийĕсемпе ĕçлесе пыракан пайĕн тĕп зоотехникĕ Е.Сапожникова пĕлтернĕ тăрăх, хуçалăхсенче май пур таран витесене йĕркене кĕртнĕ. Выльăх апатне янтлассипе те тимлĕх уйăрнă. Кăçал районĕпе пурĕ 3158 тонна утă, 14616 тонна сенаж, 362 тонна тырă сенажĕ, 2359 тонна улăм, 6252 тонна силос, 4423 тонна фураж хатĕрленĕ. Районĕпе вăтамран 12 пин те 953 тонна апат единици янтланă. Кашни условнăй выльăх пуçне 28,1 центнер апат единици хатĕрленĕ.

Выльăх апачĕ çите­лĕклĕ хывса хăварассишĕн чылай çĕрте аван ĕçленине асăнмалла. Акă, “Коминтерн” ял хуçалăхĕ 3 пин те 910 тонна выльăх апачĕ янтланă, пĕр условнăй выльăх пуçне - 32,1 центнер апат единици. Çавăн пекех “Свобода” колхоз - (32,7 центнер), “Аккозинский” (31,9 центнер), “Асамат” (31,3 центнер) хуçалăхсем выльăх апачĕ хатĕрлесе хăварассишĕн вăй-хала шеллемен.

Шел пулин те, “Искра” хуçалăхăн кăтартăвĕ чи пĕчĕкки - 12,1 центнер çеç.

Выльăх апачĕ хатĕрленисĕр пуçне фермăсене юсас ĕçе те тимлĕ пăхрĕç. Ку енĕпе каллех “Свобода”, “Коминтерн” хуçалăхсене ырăпа асăнмалла. Вĕсенче витесене юсаса çĕнетнипе пĕрлех шуратса та тухнă. “Нива”, “Путь Ильича” ял хуçалăхĕсем те, “Никитин”, “Мочковашский” фермер хуçалăхĕсем те фермăсене йĕркене кĕртнĕ. “Мочковашский” фермер хуçалăхĕнче выльăхсен хисепĕ нумаях мар пулин те, кунти ертÿçĕ хăйĕн вăй-халне шеллемесĕр хĕле хатĕрленессипе тимлет. Кунта кăçал сысна фермине тĕпрен юсаса çĕнетрĕç, дезинфекци ĕçне пурнăçларĕç. Çавăн пекех “Победа” хуçалăхра та çамрăк пăрусене хупмалли витене йĕркене кĕртнĕ.

Пĕтĕмĕшле каласан, хуçалăхсенче хĕле хатĕрленессипе вăй хучĕç.