Иртнĕ эрнере кĕçнерни кун районти Ветерансен канашĕн пленумĕ иртрĕ. Ăна Ветерансен канашĕн председателĕ В.И. Немешкин  йĕркелесе ертсе пычĕ. Пленума ял тăрăхĕсенчи Ветерансен канашĕсен председателĕсем, райадминистрацин пай начальникĕсем, çавăн пекех район пуçлăхĕ А.И.Криков тата “Пĕрлĕхлĕ Раççей” (“Единая Россия”) партирен Чăваш Республикин Патшалăх Канашĕн депутачĕ пулма тăратнă кандидат Н.В.Малов хутшăнчĕç.

Чи малтанах Н.В.Малов депутат ветерансене хăйĕн кун-çулĕпе паллаштарчĕ, пурнăçланă ĕçсем çинче чарăнса тăчĕ. Николай Владимирович аслă ăру çыннисен чун ыратăвĕпе çыхăннă ыйтăвĕсене хуравлама та килĕшрĕ.

В.И.Немешкин вара ветерансемпе умри Ваттисен кунĕ пирки калаçрĕ. Районта торжествăлла мероприятие октябрĕн 2-мĕшĕнче ирттерме палăртнă иккен. Владимир Иванович ветерансене шкулсенче йĕркеленĕ тĕл  пулусене хутшăннă чух вăрçăри хаяр çапăçусем пирки, вăл вăхăтри пурнăç çинчен тĕрĕс каласа пама ыйтрĕ.

Çавăн пекех вăл “Ветеран” хаçата районта япăх çырăнни пирки пăшăрханса калаçрĕ. Сăмах май, района çак хаçат 22 экземпляр çеç килет иккен. Шкулсенчен ăна Мăн Этменти вăтам шкул çеç çырăннă. Ку хаçатра вара паха информаци, паттăр салтаксен ырă тĕслĕхĕ... - тĕрĕссипе каласан, ачасене тĕрĕс воспитани пама, патриотизм туйăмĕсене çирĕплетме пулăшакан самантсем чылай.

Район пуçлăхĕ А.И. Криков умри тĕллевлĕ ĕçсем çинче чарăнса тăчĕ, 2006-2008 çулсенче район территорийĕнче ялсене çыхăнтарма 84 километр çул хывмаллине палăртрĕ, ялĕсене те асăнчĕ. Çавăн пекех Александр Иванович çĕнĕ урамсене электрификацилемелли пирки пĕлтерчĕ, гимнази çумĕнче пуçламăш классем валли çурт çĕклемеллине каларĕ. Спорт комплексĕ те малашлăх планĕсенче пур. Юлашкинчен ветерансем райадминистраци пуçлăхне хăйсене хумхантаракан ыйтусем пачĕç. Чылайăшне радио ыйтăвĕ канăç памасть. Выльăх пасарĕнче йĕрке тума ыйтакансем те пулчĕç.

В.И.Немешкин пленума пĕтĕмлетрĕ, малашне те пĕрле ĕçлеме чĕнсе каларĕ.